Sipas një raporti të organizatës Mercy Corps, Kabul mund të bëhet qyteti i parë modern që mbetet plotësisht pa ujë, pasi nivelet e ujit në akuiferët e tij kanë rënë deri në 30 metra gjatë 10 viteve të fundit për shkak të urbanizimit të shpejtë dhe ndryshimeve klimatike. Gati gjysma e puseve të qytetit, burimi kryesor i ujit për banorët, janë tharë, ndërsa nxjerrja e ujit tejkalon me 44 milionë metra kub në vit kapacitetin e mbushjes natyrore. Nëse këto trende vazhdojnë, të gjithë akuiferët mund të jenë tharë deri në vitin 2030, duke kërcënuar jetesën e 7 milion banorëve të Kabulit.
Raporti i Mercy Corps gjithashtu thekson përhapjen e kontaminimit të ujit, ku rreth 80% e ujit nëntokësor është i ndotur nga kanalizimi, kripësia dhe arseniku, duke e bërë atë të pasigurt për konsum. Shumë familje shpenzojnë deri në 30% të të ardhurave për ujë, ndërsa disa po detyrohen të marrin borxhe për nevojat e tyre ujore.
Rritja e shpejtë e popullsisë dhe mungesa e qeverisjes së centralizuar kanë përkeqësuar krizën. Ndihmat ndërkombëtare për ujë dhe sanitarizim janë të pakta dhe janë ngrirë që nga rikthimi i talebanëve në pushtet në 2021, ndërsa reduktimi i fondeve nga Shtetet e Bashkuara ka rënduar më tej situatën.
Një projekt i rëndësishëm, tubacioni i lumit Panjshir, që mund të furnizojë 2 milion banorë me ujë të pijshëm, po pret miratimin e buxhetit dhe investitorët për fillimin e zbatimit. Ekspertët dhe banorët theksojnë nevojën për veprime urgjente për të shmangur një krizë katastrofike ujore në kryeqytetin afgan.
