Kremlini ka paralajmëruar se Rusia do të përgjigjet ndaj operacionit të guximshëm të Ukrainës me dronë “si dhe kur ta shohë të arsyeshme”, duke konfirmuar në mënyrë të tërthortë raportimet se Vladimir Putin i kishte thënë Donald Trump-it se Moska është e detyruar të hakmerret.
Sipas zyrtarëve amerikanë, shërbimi sekret ukrainas SBU kreu gjatë fundjavës një sulm të papritur me dronë në katër baza ajrore ruse, duke dëmtuar deri në 20 avionë luftarakë në thellësi të territorit të Rusisë. Kjo ka shtuar frikën për një kundërpërgjigje të ashpër nga Moska.
Zëdhënësi i Kremlinit, Dmitry Peskov, i pyetur të enjten se si do të përgjigjej Rusia, u shpreh: “Si dhe kur ushtria jonë ta shohë të arsyeshme.”
Presidenti amerikan Donald Trump tha se Putin i kishte thënë “shumë fort” gjatë një telefonate të papritur të mërkurën, se Rusia do të përgjigjej ndaj sulmeve në bazat ajrore, sipas The Guardian.
Ambasada amerikane në Ukrainë ka paralajmëruar për rrezik të vazhdueshëm nga “sulme ajrore të konsiderueshme” dhe u ka bërë thirrje qytetarëve amerikanë të tregojnë kujdes.
Vetëm disa orë pas bisedës mes Trump dhe Putin, Rusia nisi një valë sulmesh me raketa dhe dronë në Ukrainë gjatë natës.
Në qytetin verior Pryluky, një dron goditi një ndërtesë banimi, duke vrarë pesë persona, mes tyre një djalë njëvjeçar, nëna dhe gjyshja e tij.
Presidenti ukrainas Volodymyr Zelenskyy tha se fëmija ishte nipi i një punonjësi emergjence. “Një nga punonjësit e shpëtimit mbërriti për të ndihmuar… në shtëpinë e tij. Doli që një dron Shahed kishte goditur shtëpinë e tij”, tha Zelenskyy në Telegram.
Në qytetin jugor të Khersonit, raketat ruse goditën një ndërtesë të administratës lokale, duke krijuar një krater të madh.
Zyrtarët rusë kanë lënë të kuptohet se këto nuk janë ende hakmarrjet për sulmin me dronë të fundjavës, i cili ndodhi një ditë përpara se të shembeshin dy ura, ngjarje ku humbën jetën shtatë persona dhe për të cilat Moska fajësoi sabotazhin ukrainas.
Pas operacionit të paprecedent të Ukrainës – që përfshiu kontrabandimin e dronëve me kamionë në Rusi – blogerë pro-Kremlinit dhe komentatorë të njohur në mediat ruse bënë thirrje për hakmarrje të ashpër, madje disa kërkuan përdorimin e armëve bërthamore.
Megjithëse zyrtarët rusë kanë përmendur mundësinë e përdorimit të armëve bërthamore gjatë luftës në Ukrainë, analistët e konsiderojnë shumë të pamundur që ato të përdoren në këtë fazë.
Doktrina bërthamore e Rusisë lejon përdorimin e armëve bërthamore vetëm në rast se vendi përballet me një kërcënim kritik ndaj sovranitetit.
Eksperti i forcave bërthamore ruse me qendër në Gjenevë, Pavel Podvig, tha në një intervistë për “Meduza” se operacionet e fundit të Ukrainës nuk përbëjnë një kërcënim të tillë, dhe nuk e cënojnë kapacitetin bërthamor strategjik të Rusisë.
Për më tepër, një sulm bërthamor do të përballej me dënim të ashpër nga Kina, aleatja më e fuqishme e Rusisë. Presidenti Xi Jinping ka paralajmëruar më herët Putinin kundër përdorimit të armëve bërthamore në Ukrainë.
Në vend të kësaj, siç ka ndodhur edhe në të kaluarën pas suksesesh të Ukrainës në fushëbetejë, Moska mund të reagojë me një valë të re sulmesh me raketa balistike ose me raketën eksperimentale “Oreshnik”, e cila është përdorur të paktën një herë vitin e kaluar.
Ukraina ka intensifikuar veprimet e saj sabotazhi në javën e fundit, përfshirë vendosjen e eksplozivëve nën një urë strategjike që lidh Rusinë me Gadishullin e Krimesë, të aneksuar nga Moska në vitin 2014.
Të mërkurën, Vladimir Putin reagoi për herë të parë me zemërim ndaj sulmeve ukrainase, duke i cilësuar si “akte terroriste”. “Si mund të zhvillojmë takime në këto kushte? Çfarë kemi për të biseduar? Kush negocion me terroristë?”, tha ai.
Trump nuk ka bërë ende komente publike mbi sulmin me dron të Ukrainës, por burime që kanë folur me të për Axios thanë se ai e kishte përshkruar operacionin si “të fuqishëm” dhe “impresionues”, duke shtuar se kjo do të përbëjë një pengesë për iniciativën e tij diplomatike për të ndalur luftën.
Ndërsa këto sulme përfaqësojnë një goditje të ndjeshme ndaj kapaciteteve ushtarake të Rusisë dhe një shtysë për moralin ukrainas, tabloja më e gjerë mbetet e vështirë për Kievin.
Më shumë se tre vjet pas fillimit të pushtimit, Rusia është sërish në ofensivë, duke bërë përparime në lindje të Ukrainës dhe duke vijuar me bombardime ndaj qyteteve e civilëve ukrainas.
Forcat ruse kanë avancuar më tej në rajonin verior të Sumyt, duke kërcënuar kryeqendrën rajonale pas marrjes së mbi 150 kilometra katrorë në më pak se dy javë.
Me Putinin që nuk tregon asnjë gatishmëri për armëpushim, zyrtarët ukrainas dhe ushtria po përgatiten për një ofensivë të re ruse gjatë verës, me synim avancimin në rajonet e Sumyt dhe Kharkivit.
