NATO duhet të përshpejtojë ritmin e forcimit të mbrojtjes për të kapërcyer përgatitjet ushtarake të Rusisë, e cila tashmë po planifikon “lëvizjen e radhës” përtej Ukrainës, paralajmëroi të mërkurën ambasadori amerikan në Aleancë, Matthew Whitaker.
Paralajmërimi vjen një ditë para takimit të ministrave të Mbrojtjes së NATO-s, që do të mbahet të enjten në Bruksel dhe që synon të arrijë një marrëveshje për rritjen e shpenzimeve ushtarake përpara samitit të rëndësishëm që zhvillohet këtë muaj në Hagë.
Presidenti amerikan Donald Trump ka kërkuar nga aleatët e SHBA-së që të angazhohen për të shpenzuar të paktën 5% të PBB-së për mbrojtjen. Ndërkohë, Sekretari i Përgjithshëm i NATO-s, Mark Rutte, duket se është afër sigurimit të një kompromisi që do të përfshijë 3.5% për mbrojtjen bazë dhe 1.5% për fusha të lidhura me sigurinë, si infrastruktura.
“Urgjenca e këtij momenti është e padiskutueshme. Ndërsa konflikti në Ukrainë vazhdon, Moska po përgatit hapat e saj të ardhshëm,” deklaroi Whitaker para gazetarëve.
“Kremlini po synon rindërtimin e ushtrisë. Aleatët e NATO-s duhet të ecin më shpejt se Rusia. Nuk kemi alternativë tjetër. Të jem i qartë: koha është tani.”
Sipas tij, Shtetet e Bashkuara presin që çdo vend aleat të paraqesë plane konkrete, buxhete, afate dhe objektiva të qarta për të arritur synimin e 5% të PBB-së për mbrojtje.
“Ky nuk do të jetë vetëm një premtim. Ky do të jetë një angazhim i detyrueshëm. Çdo aleat duhet të fillojë që tani investimin në nivelin 5%, nuk është një sugjerim,” theksoi ai.
Whitaker shtoi se SHBA mbetet e përkushtuar ndaj nenit pesë të traktatit të NATO-s për mbrojtjen e përbashkët, por pret që edhe aleatët të bëjnë pjesën e tyre përmes rritjes së shpenzimeve.
“Do të mbrojmë çdo centimetër të territorit të NATO-s, dhe do ta bëjmë këtë nga një pozitë fuqie të pakrahasueshme,” tha ai.
Ministrat e Mbrojtjes do të miratojnë në Bruksel objektiva të reja për pajisje ushtarake, të cilat do të nevojiten për përballjen me kërcënimet nga Rusia.
“Do të ndërmarrim një hap të madh përpara,” deklaroi Mark Rutte.
“Këto objektiva përshkruajnë saktësisht forcat dhe kapacitetet konkrete që i duhen NATO-s.”
Ai u shpreh i bindur se vendet anëtare do të bien dakord për një marrëveshje të re për shpenzimet në samitin e Hagës.
Kreu i NATO-s gjithashtu nënvizoi se Shtetet e Bashkuara kanë konfirmuar qartë angazhimin e tyre për mbrojtjen kolektive, pavarësisht se Sekretari amerikan i Mbrojtjes, Pete Hegseth, nuk mori pjesë në një takim të mbështetësve të Ukrainës që u mbajt në Bruksel të mërkurën.
