Partia Demokratike ka dorëzuar sot një kërkesë në Komisionin Qendror të Zgjedhjeve (KQZ), duke ngritur shqetësimin për fatin e rreth 130 mijë fletëve të votimit të papërdorura në zgjedhjet e 11 majit, dhe ka kërkuar nisjen e një hetimi administrativ.
KQZ ka reaguar menjëherë përmes një letre zyrtare, ku sqaron se numri total i fletëve të papërdorura është 1,935,328, sipas procesverbaleve të raportuara nga çdo qendër votimi (QV). Por këtij numri i shtohen edhe disa kategori të tjera:
- 27,340 fletë votimi që i përkasin QV-ve ku është përdorur votimi elektronik (në Vorë dhe Njësinë nr. 10, Tiranë), ndaj nuk janë përdorur fizikisht;
- 99,455 fletë votimi që, për shkak të gabimeve në raportim, rezultojnë si “0” në procesverbale përkatëse në 233 QV;
- 5,369 fletë votimi të tjera janë të papërdorura, por raportuar me gabime në procesverbalet e 1,380 QV-ve.
KQZ thekson se sqarimet janë pjesë e një verifikimi të detajuar dhe paralajmëron se gabimet në procesverbalet e QV-ve po analizohen për të përmirësuar procesin dhe transparencën zgjedhore.
