Shtatë persona kanë humbur jetën dhe dhjetëra të tjerë janë plagosur pas dy ngjarjeve të ndara tragjike në Rusi, ku ura të ndryshme janë shembur mbi linjat hekurudhore në rajonet Bryansk dhe Kursk, pranë kufirit me Ukrainën.
Autoritetet ruse kanë nisur hetime, ndërsa një prej ngjarjeve dyshohet të jetë shkaktuar nga “ndërhyrje të paligjshme”.
Ngjarja më e rëndë ndodhi në rajonin e Bryanskut, ku një urë rrugore u shemb mbi binarët hekurudhorë të shtunën në mbrëmje, duke shkaktuar daljen nga shinat të një treni pasagjerësh që ishte nisur nga qyteti Klimovo drejt Moskës.
Guvernatori i Bryanskut, Aleksandr Bogomaz, konfirmoi se si pasojë e aksidentit humbën jetën shtatë persona dhe u plagosën të paktën 66 të tjerë, mes tyre tre fëmijë, përcjell The Guardian.
Treni u përplas me urën e shembur në zonën e autostradës federale në rrethin Vygonichsky, rreth 100 kilometra larg kufirit me Ukrainën.
Ndërkohë, në një ngjarje të veçantë në rajonin fqinj të Kurskut, një tjetër urë hekurudhore u shemb gjatë natës, duke shkaktuar daljen nga shinat të një treni mallrash. Guvernatori i përkohshëm i rajonit, Aleksandr Khinshtein, tha se lokomotiva e trenit ishte duke kaluar mbi urë kur ajo u shemb dhe një pjesë e trenit ra në rrugën poshtë. Një nga makinistët pësoi dëmtime në këmbë, ndërsa i gjithë ekuipazhi u dërgua në spital.
Pamjet e publikuara në rrjete sociale nga vendi i ngjarjes në Bryansk tregonin shpëtimtarë që përpiqeshin të kalonin mbi trupat e përkulur të vagonëve të shkatërruar të trenit të operatorit shtetëror Russian Railways, ndërsa në një video tjetër dëgjoheshin britma nga vendi i aksidentit.
Për momentin, autoritetet nuk kanë dhënë detaje zyrtare për shkakun e shembjeve të urave.
Fillimisht, operatori Moscow Railways sugjeroi se ngjarja në Bryansk mund të ishte pasojë e “ndërhyrjes së paligjshme në funksionimin e transportit”, por më vonë kjo referencë u hoq nga komunikimi zyrtar.
Ukraina, e cila më herët është akuzuar nga Moska për incidente të ngjashme në territorin rus, nuk ka komentuar mbi ngjarjet.
Një gazetar i agjencisë AFP nga Moska raportoi se disa ambulanca ishin parkuar në stacionin hekurudhor Kievsky duke pritur mbërritjen e të plagosurve. Ministria ruse e Emergjencave tha se një ekip ndihme ndodhej në terren në Bryansk, ndërsa Russian Railways konfirmoi se ka dërguar mjete për riparimin e infrastrukturës.
Që prej fillimit të agresionit të Rusisë kundër Ukrainës në shkurt 2022, në territorin rus janë regjistruar dhjetëra sulme sabotazhi, shumë prej të cilave kanë pasur në shënjestër rrjetin hekurudhor, që Kievi e konsideron si linjë strategjike për transportimin e trupave dhe armatimeve drejt vijës së frontit në Ukrainë.
Rajonet kufitare të Bryanskut, Kurskut dhe Belgorodit kanë qenë vazhdimisht në qendër të përplasjes, me sulme të përsëritura me artileri, dronë dhe raketa, si dhe me depërtime të grupeve speciale nga territori ukrainas.
