Izraeli informoi zëvendëskryetarin e Autoritetit Palestinez (PA) Hussein al-Sheikh se nuk do lejonte një delegacion të ministrave të jashtëm arabë, përfshirë ministrin e Jashtëm të Arabisë Saudite Faisal bin Farhan, të vizitojë Autoritetin Palestinez dhe të takohet me Presidentin Mahmoud Abbas, mësoi Ynet. Takimi ishte planifikuar të mbahej të dielën.
Pas njoftimit nga autoritetet izraelite, ministri i Jashtëm i Arabisë Saudite Faisal bin Farhan vendosi “të shtyjë” vizitën e tij të planifikuar në Autoritetin Palestinez.
Burimet palestineze i thanë Reuters se Autoriteti Palestinez e kishte ftuar bin Farhanin të drejtonte një delegacion të ministrave të jashtëm arabë për të vizituar Ramallahun “dhe Bregun Perëndimor të pushtuar”.
Sipas një raporti të CNN, vizita ishte pjesë e një përpjekjeje të Arabisë Saudite për të siguruar njohjen ndërkombëtare të një shteti palestinez pasi Riadi ishte i zemëruar për kundërshtimin e Izraelit për t’i dhënë fund luftës. Arabia Saudite, së bashku me Francën, ka udhëhequr nismën për të mbledhur një komitet ndërkombëtar në OKB në Nju Jork muajin e ardhshëm
“Autoriteti Palestinez, i cili edhe sot e kësaj dite refuzon të dënojë masakrën e 7 tetorit, synonte të organizonte një takim sfidues të ministrave të jashtëm arabë në Ramallah për të diskutuar krijimin e një shteti palestinez”, tha një burim diplomatik.
“Një shtet i tillë me siguri do shndërrohej në një shtet terrorist në zemër të Izraelit. Izraeli nuk do bashkëpunojë me lëvizjet e krijuara për ta dëmtuar atë dhe sigurinë e tij. Autoriteti Palestinez duhet të ndalojë shkeljen e marrëveshjeve të tij me Izraelin në të gjitha nivelet.”
Vizita e planifikuar e ministrit saudit do kërkonte kalimin në Bregun Perëndimor, përmes Kalimit Kufitar Allenby nga Jordania, e cila është nën kontrollin e Izraelit. CNN tha se një zyrtar izraelit konfirmoi për rrjetin se qeveria ishte informuar për vizitën e planifikuar, por do e bllokonte atë.
