Prokuroria e Posaçme Antikorrupsion ka ndërmarrë një operacion të gjerë për goditjen e një skeme të mirëorganizuar kontrabande me cigare, ku janë përfshirë zyrtarë doganorë, biznesmenë dhe shtetas të huaj. Hetimet kanë zbuluar një rrjet kriminal të strukturuar që vepronte për kontrabandimin e cigareve të prodhuara brenda territorit të Shqipërisë drejt vendeve fqinje dhe më tej në Bashkimin Evropian. Veprimtaria kriminale përfshinte gjithashtu korrupsion, evazion fiskal dhe fshehje të ardhurash.
Me vendim të Gjykatës së Posaçme Kundër Korrupsionit dhe Krimit të Organizuar (GJKKO), janë lëshuar gjithsej 36 masa sigurie. Nga këto, 15 janë masa “arrest me burg”, ndërsa 20 të tjera janë masa të tipit “detyrim për t’u paraqitur” dhe “ndalim i daljes jashtë shtetit”. Po ashtu, është dhënë edhe një masë “arrest në shtëpi”. Deri më tani, janë ekzekutuar 5 nga urdhrat për arrest me burg dhe 15 masa për detyrim paraqitjeje apo ndalim dalje nga vendi.
Sipas SPAK, personat e përfshirë vepronin në një skemë të strukturuar dhe të sofistikuar që kishte si qëllim kryesor shmangien e detyrimeve doganore dhe fiskale, duke krijuar një dëm të konsiderueshëm ekonomik për shtetin dhe duke përfituar në mënyrë të paligjshme nga tregtia e jashtëligjshme e cigareve.
Autoritetet vijojnë hetimet për të identifikuar të gjithë pjesëtarët e këtij rrjeti dhe për të dokumentuar plotësisht aktivitetin kriminal të tij. Operacioni vjen si pjesë e përpjekjeve të vazhdueshme për të luftuar krimin ekonomik dhe për të vendosur para drejtësisë zyrtarët dhe aktorët privatë që abuzojnë me detyrën apo ligjin.
