Kryeministri Edi Rama ka zgjedhur t’i përgjigjet me ironi akuzave të opozitës për vjedhje votash dhe manipulim të zgjedhjeve, gjatë një takimi me deputetët në festën e fitores të mbajtur të hënën pasdite.
Në fjalën e tij, Rama hodhi poshtë çdo aludim për manipulim elektoral, duke theksuar se rezultati i zgjedhjeve është produkt i një pune të gjatë dhe të organizuar, që sipas tij nisi menjëherë pas fitores në zgjedhjet vendore.
“Ne nuk kemi asnjë zhgënjim këtu. Avazi është siç e kemi ditur dhe siç e paralajmërova unë me precizionin e atij që tregon një film që e ka parë dhjetë herë. Ne morëm thjesht frytet e një pune të gjatë, këmbëngulëse, të programuar me një kalendar që pas fitores së zgjedhjeve vendore”, tha Rama.
Duke ironizuar pretendimet e opozitës, kryeministri foli për një “univers paralel” të kundërshtarëve të tij politikë, të mbushur me “zarfe votash, trena bullgarë dhe vargmale kanabisi”.
“Këto ditë universi i tyre paralel është mbushur me thasë re të zeza që derdhin ngado shiun e votave të vjedhura. Zarfe votash që mësyjnë nga të katër anët si tufa zogjsh prej letre, trena bullgarë që përshkojnë malet dhe luginat e Shqipërisë për të shumëfishuar votat e regjimit, vargmale me kanabis që lulëzojnë me bekimin e partisë-shtet dhe me licencat imagjinare të shtetit-parti, dhjetëra deputetë që kanë dalë nga shpellat e krimit”, deklaroi ai.
Rama e cilësoi reagimin e opozitës si një skenar të përsëritur dhe theksoi se PS nuk është e befasuar nga këto qëndrime.
Sipas tij, kundërshtarët nuk janë të gatshëm të pranojnë humbjen dhe vijojnë të ndërtojnë narrativa të pabaza për të justifikuar rezultatin.
