Në Ditën e Presidentit, Presidentja e Kosovës, Vjosa Osmani, ka kujtuar figurën e ish-presidentit historik Ibrahim Rugova, duke e cilësuar si “atin themeltar të Republikës së Kosovës”.
Përmes një postimi në rrjetet sociale, Osmani theksoi rëndësinë e vizionit të Rugovës për shtetformimin dhe orientimin euroatlantik të vendit, duke u shprehur se “ecim hapave të tij” në ndërtimin e Kosovës që ëndërruan gjenerata të tëra.
“Sot është Dita e Presidentit, e vendosur si e tillë nga Presidenti ynë historik Dr. Ibrahim Rugova, ati themeltar i Republikës sonë. Sot ecim hapave të tij, në përpjekje të vazhdueshme për ta bërë Kosovën atë që e deshën e për të cilën sakrifikuan breza të tërë”, shkroi Osmani.
Dita e Presidentit shënohet më 24 maj në nder të kontributit të Presidentit Rugova dhe të institucionit të Presidentit në konsolidimin e shtetit të Kosovës.
