Pas përfundimit të numërimit të votave të diasporës, është zyrtarizuar përbërja e re e Kuvendit të Shqipërisë, që do të nisë punimet në muajin shtator. Partia Socialiste ka dalë sërish forca më e madhe politike në vend, duke siguruar 83 mandate, prej të cilave 46 nga lista e mbyllur dhe 37 nga lista e hapur. Pjesë e këtij grupi parlamentar do të jenë 34 gra dhe 48 burra, ndërsa 53 prej tyre janë deputetë të zgjedhur për herë të parë, duke shënuar një risi në përfaqësimin socialist.
Nga ana tjetër, Partia Demokratike dhe aleatët e saj kanë siguruar 50 mandate – 43 nga lista e mbyllur dhe vetëm 7 nga lista e hapur. Vetëm 14 emra të rinj janë pjesë e grupit të PD-së, ndërsa pjesa tjetër përbëhet kryesisht nga figura të njohura dhe ish-deputetë. Brenda këtij grupi përfshihen edhe 8 mandate të dhëna aleatëve nga Sali Berisha, në kuadër të marrëveshjes së koalicionit.
Në Kuvend do të ketë gjithashtu një përfaqësim më të larmishëm të forcave politike:
- Partia Socialdemokrate (PSD) ka siguruar 3 mandate, duke rikthyer në Parlament kreun e saj Tom Doshi.
- Partia “Mundësia” e Agron Shehajt ka fituar 2 mandate.
- Koalicioni “Nisma Shqipëria Bëhet” dhe Lëvizja Bashkë e Arlind Qorit kanë marrë nga një mandat secili, duke sjellë për herë të parë në Kuvend zëra të rinj dhe alternativa politike që synojnë përfaqësim ndryshe nga partitë tradicionale.
Përbërja e re e Kuvendit shënon jo vetëm një dominim të PS-së, por edhe një prani më të madhe të deputetëve të rinj dhe partive të vogla, që pritet të ndikojnë në dinamikën e legjislaturës së ardhshme.
