Grupi palestinez Hamas ka konfirmuar të shtunën se është hapur një raund i ri bisedimesh për armëpushim me Izraelin, që po zhvillohen në Doha të Katarit.
Këtë e bëri të ditur zyrtari i Hamasit, Taher al-Nono, për agjencinë Reuters, duke deklaruar se bisedimet po zhvillohen “pa parakushte”.
Ky zhvillim vjen në një moment kur ushtria izraelite ka nisur një ofensivë të re tokësore në Rripin e Gazës, që synon sipas saj “përmbushjen e plotë të objektivave të luftës”.
Ndërkohë, autoritetet shëndetësore në Gaza kanë raportuar se gjatë 24 orëve të fundit janë vrarë 146 palestinezë nga sulmet izraelite.
Sipas burimeve vendase, vetëm gjatë natës janë vrarë 58 persona, ndërsa spitalet, përfshirë atë indonezian, përballen me mungesa të mëdha furnizimesh dhe janë pranë kolapsit, përcjell The Guardian.
Sekretari i përgjithshëm i OKB-së, António Guterres, ka shprehur shqetësimin për përshkallëzimin e operacionit tokësor izraelit, duke bërë thirrje për një armëpushim të menjëhershëm.
Po ashtu, Komisioneri i Lartë i OKB-së për të Drejtat e Njeriut e ka quajtur përshkallëzimin e sulmeve si “të barasvlershëm me spastrimin etnik”.
Nga ana tjetër, Irani ka reaguar përmes liderit suprem, Ali Khamenei, i cili akuzoi presidentin amerikan Donald Trump se kishte “gënjyer” kur tha se do të përdorte fuqinë për të sjellë paqe në Gaza.
Ndërkohë, në Bagdad është mbajtur një samit arab për të diskutuar krizën në rajon, ku Iraku ka premtuar 40 milionë dollarë ndihmë për rindërtimin e Gazës dhe Libanit.
Në Libanin jugor, Izraeli ka deklaruar se ka vrarë një komandant të Hezbollahut gjatë një operacioni ajror.
Pavarësisht zhvillimeve diplomatike, situata në terren mbetet jashtëzakonisht e tensionuar dhe e rrezikshme për civilët palestinezë, ndërsa të dyja palët duket se qëndrojnë të palëkundura në pozicionet e tyre.
