Presidenti rus Vladimir Putin nuk do të udhëtojë drejt Turqisë për bisedimet e paqes mbi luftën në Ukrainë, pavarësisht thirrjeve të presidentit ukrainas Volodymyr Zelensky që ai të marrë pjesë.
Sipas një deklarate nga Kremlini, delegacioni rus në bisedimet që do të zhvillohen të enjten në Stamboll do të kryesohet nga ndihmësi presidencial Vladimir Medinsky.
Zelensky kishte shprehur më herët gatishmërinë për të marrë pjesë në bisedime dhe për t’u takuar personalisht me Putinin nëse ky i fundit do të pranonte, duke thënë se do të bënte gjithçka që të siguronte zhvillimin e një takimi ballë për ballë.
Presidenti ukrainas do të ndodhet të enjten në kryeqytetin turk, Ankara, ku do të takohet me presidentin turk Recep Tayyip Erdogan.
Putin dhe Zelensky nuk janë takuar personalisht që nga dhjetori i vitit 2019. Rusia dhe Ukraina zhvilluan për herë të fundit negociata të drejtpërdrejta në mars të vitit 2022 në Stamboll, pak pas nisjes së pushtimit të plotë të Ukrainës nga Moska.
Që atëherë, luftimet kanë vazhduar intensivisht në Ukrainë. Forcat ruse kanë zgjeruar gradualisht kontrollin e tyre në territore të reja, kryesisht në lindje të vendit gjatë vitit të fundit.
Fillimisht, Putin kishte kërkuar zhvillimin e bisedimeve direkte mes Rusisë dhe Ukrainës në qytetin më të madh të Turqisë “pa kushte paraprake”, përpara se Zelensky të njoftonte se do të merrte pjesë personalisht dhe të priste që edhe presidenti rus të ishte i pranishëm.
Më herët të mërkurën, Donald Trump hodhi idenë se mund të bashkohej vetë në takim nëse Putin do të merrte pjesë.
Presidenti amerikan, i cili aktualisht ndodhet në Katar, u tha gazetarëve se nuk e dinte nëse homologu i tij rus do të merrte pjesë “nëse unë nuk jam atje”.
“E di që ai do të donte që unë të isha aty, dhe kjo është një mundësi. Nëse mund të ndalim luftën, do ta merrja seriozisht parasysh,” tha Trump.
SHBA pritet të dërgojë një delegacion të nivelit të lartë në bisedime, përfshirë diplomatin e saj më të lartë, Marco Rubio.
Që prej rikthimit në Shtëpinë e Bardhë, presidenti Trump ka synuar të ndërmjetësojë një armëpushim mes Rusisë dhe Ukrainës.
