Presidenti francez Emmanuel Macron tha të martën se ishte i hapur për të diskutuar vendosjen e mundshme të armëve bërthamore të vendit të tij diku tjetër në Evropë.
Komentet u bënë në një intervistë me transmetuesin francez TF1 të martën në mbrëmje.
Macron vuri në dukje se Shtetet e Bashkuara tashmë kanë stacionuar avionë të armatosur bërthamorë në Evropë.
“Amerikanët kanë bomba në aeroplanë në Belgjikë, Gjermani, Itali, Turqi”, tha Macron. “Ne jemi gati ta hapim këtë diskutim.”
“Do ta përcaktoj kornizën në një mënyrë shumë specifike në javët dhe muajt që vijnë,” tha ai.
Macron rendit kushtet për ndarjen e ombrellës bërthamore të Francës
Në intervistë, Macron e bëri të qartë se çdo zgjerim i mbrojtjes bërthamore të Francës në vendet e tjera evropiane do t’i nënshtrohej kushteve.
Franca, fuqia e vetme bërthamore e Bashkimit Evropian, nuk do të paguante për sigurinë e të tjerëve dhe aftësitë e saj mbrojtëse duhet të mbeten plotësisht të paprekura, theksoi ai.
Kontrolli përfundimtar mbi përdorimin e armëve do të mbetet gjithashtu vetëm te presidenti francez, tha Macron.
Franca mbante rreth 280 koka bërthamore në vitin 2024, sipas shifrave të Institutit Ndërkombëtar të Kërkimeve për Paqen në Stokholm .
Ushtria e saj ka fuqinë t’i lëshojë këto në mënyrë të pavarur nga nëndetëset e veta ose të përdorë avionë luftarakë për t’i lëshuar ato nga qielli.
Britania gjithashtu ka armë bërthamore , rreth 225 prej të cilave janë të grumbulluara. Por programi i nëndetëseve bërthamore Trident i vendit është i lidhur ngushtë me sistemin amerikan dhe mbështetet te SHBA-ja për mirëmbajtje.
Kjo ngre “shqetësime në lidhje me pavarësinë e [Trident]”, sipas organizatës britanike Chatham House ./DW
