Kreu i Partisë Demokratike, Sali Berisha, ka denoncuar një rast të krimit elektoral në Kukës, përmes një postimi në Facebook. Sipas denoncimit të qytetarit dixhital, Gentian Berberi, një individ i lidhur ngushtësisht me strukturat e policisë dhe i akuzuar si “narko-komisar”, ka shpërndarë para në këmbim të votave.
Në mesazhin e qytetarit dixhital, thuhet se Berberi ka përdorur një furgon policie për të shpërndarë paratë dhe ka ushtruar presion mbi bizneset që të mbështesin kandidatin e Partisë Socialiste, me udhëzimet e kryeministrit Edi Rama.
Kreu i PD-së ka dënuar ashpër këtë akt, duke kërkuar nga organet përkatëse të marrin masa ndaj këtij krimi elektoral. Ai e ka cilësuar këtë ngjarje si një veprim të dënueshëm dhe ka kërkuar që Gentian Berberi të përballet me drejtësinë.
Në postimin e tij, Berisha ka shkruar: “Dënoj me forcën më të madhe krimin e shëmtuar të narko-komisarit Berberi”, duke e ndarë mesazhin e qytetarit dixhital që e denoncon këtë veprim kriminal.
