Kryetari i Partisë Demokratike, Sali Berisha, zhvilloi mbrëmjen e së martës një miting përmbyllës në qytetin e Korçës, ku lëshoi një mesazh të qartë për qytetarët përpara zgjedhjeve të 11 majit. Ai theksoi se kjo datë do të shënojë një pikë kthese historike për Shqipërinë, duke e quajtur “ditën që ndan dy epoka” – fundin e një periudhe të gjatë të keqqeverisjes dhe fillimin e një epoke të re, të bazuar në demokraci dhe shpresë.
Në fjalën e tij, Berisha nuk kurseu akuzat ndaj qeverisë aktuale, duke përmendur se në 12 vite, regjimi i kryeministrit Edi Rama ka çuar në rrënimin e ekonomisë, shkatërrimin e infrastrukturës dhe largimin masiv të qytetarëve. “Fermerët mbetën pa treg, studentët pa shkolla, qytetarët pa punë dhe pa ilaçe. Rruga Korçë–Ersekë është ende në ndërtim pas një dekade, ndërsa rruga Qafë Plloç–Qukës s’ka përfunduar kurrë,” theksoi ai.
Berisha vlerësoi kontributin e qytetarëve të Korçës, Devollit, Pogradecit dhe Ersekës, duke i quajtur “mbrojtës të vërtetë të vlerave shqiptare”. Ai përmendi me emër drejtuesin politik të PD-ASHM, Ivi Kaso, dhe sekretarin e Përgjithshëm të Partisë së Lirisë, Tedi Blushi, duke i konsideruar aleatë kyç në këtë betejë për ndryshim.
Në një moment të veçantë, Berisha sulmoi ashpër përpjekjet e Ramës për të “blerë heshtjen” e kritikëve. Ai solli në vëmendje rastin e gazetarit Ilir Vrenozi, duke e përshëndetur në mënyrë të veçantë në ditëlindjen e tij dhe duke thënë: “Rama nuk duron dot kritikat dhe tentoi ta blinte Vrenozin. Por ai nuk është blerë dhe sot i uroj edhe 100 vite jetë!”
Ai përfundoi me një thirrje të fortë për pjesëmarrje masive në zgjedhje dhe mbështetje për kandidatët e opozitës. “Me votën tuaj më 11 maj, ne nuk zgjedhim vetëm një kandidat. Ne zgjedhim të ardhmen e fëmijëve tanë, të Shqipërisë, të lirisë,” u shpreh Berisha mes duartrokitjeve të shumta të të pranishmëve.
