Deputetja e Partisë së Lirisë, Monika Kryemadhi, është paraqitur sot në ambientet e SPAK (Prokuroria e Posaçme kundër Korrupsionit dhe Krimit të Organizuar), në zbatim të masës së sigurisë “detyrim paraqitje” të vendosur ndaj saj.
Gjatë hyrjes në institucionin e drejtësisë, Kryemadhi foli shkurt për mediat, duke sqaruar se orari i paraqitjes i ishte shtyrë me një orë. E pyetur nga gazetarët për veshjen e saj me rroba të zeza, deputetja u përgjigj me ironi:
“Nuk është se kam ndonjë gjë të keqe, por do ua them pastaj,” tha ajo, duke shmangur komentet e mëtejshme para takimit me prokurorët.
Kryemadhi ndodhet nën hetim në kuadër të një çështjeje të hapur nga SPAK, ndërsa vijon të mbajë qëndrim kritik ndaj veprimeve të këtij institucioni.
