Punësimi në SHBA ka shënuar një ngadalësim të lehtë gjatë muajit prill, ndërsa perspektiva për tregun e punës po errësohet gjithnjë e më shumë për shkak të politikave tarifore të presidentit Donald Trump, të cilat kanë shtuar pasigurinë ekonomike, përcjell Reuters.
Sipas të dhënave të publikuara nga Byroja e Statistikave të Punës në Departamentin e Punës, në prill janë shtuar 177,000 vende pune jashtë sektorit bujqësor, krahasuar me 185,000 vende pune të shtuar në mars, një shifër që tashmë është rishikuar në ulje.
Ekonomistët e anketuar nga Reuters kishin parashikuar një shtesë prej 130,000 vendesh pune për muajin prill. Shifrat e parashikuara varionin nga 25,000 deri në 195,000 vende të reja pune. Ndërkohë, shkalla e papunësisë mbeti e pandryshuar në 4.2%.
Megjithëse raporti është retrospektiv dhe nuk pasqyron ende plotësisht ndikimin e tarifave, ekonomia amerikane është ndjerë e goditur në tremujorin e parë për shkak të një vale importesh të nxitura nga frika për tarifat e reja.
Vendimi i presidentit Trump për të vendosur tarifa të larta mbi shumicën e importeve nga partnerët tregtarë – përfshirë një tarifë 145% për mallrat kineze – ka përshkallëzuar luftën tregtare me Pekinin, duke sjellë pasoja të rënda për kushtet financiare.
Edhe pse Trump vendosi një shtyrje prej 90 ditësh për tarifat reciproke, ekonomistët paralajmërojnë se kjo “pauzë” ka lënë bizneset në një gjendje pezull, duke rrezikuar një recesion nëse situata nuk qartësohet shpejt.
Pavarësisht këtyre zhvillimeve, tregu i punës ka treguar ende rezistencë, pasi punëdhënësit hezitojnë të largojnë punonjës pas mungesave të mëdha të fuqisë punëtore gjatë dhe pas pandemisë së COVID-19. Megjithatë, sinjalet paralajmëruese po shtohen.
Sentimenti i bizneseve është në rënie të vazhdueshme, dhe ekonomistët parashikojnë që kjo do të çojë eventualisht në shkurtim të vendeve të punës. Disa linja ajrore kanë tërhequr parashikimet financiare për vitin 2025 për shkak të pasigurive mbi shpenzimet e udhëtimeve jo të domosdoshme.
Kompania General Motors uli parashikimet për fitimet e vitit 2025 dhe paralajmëroi një goditje prej 4 deri në 5 miliardë dollarë nga tarifat. Ndërkohë, Kina ka ndaluar linjat e saj ajrore të marrin avionë të rinj nga Boeing, ndërsa Ryanair kërcënoi me anulim të porosive për qindra avionë nëse lufta tregtare rrit ndjeshëm çmimet.
Në këtë klimë pasigurie, pritet që Rezerva Federale të mbajë të pandryshuar normën bazë të interesit në intervalin 4.25%-4.50% në mbledhjen e saj të ardhshme. Ekonomistët mendojnë se kompanitë fillimisht do të shkurtojnë orët e punës përpara se të kalojnë në pushime masive nga puna.
Shumica e analistëve presin që ndikimi real i tarifave të nisë të ndjehet qartë gjatë verës në të dhënat ekonomike zyrtare, përfshirë raportet mbi punësimin dhe inflacionin.
Vlen të theksohet se situata është përkeqësuar edhe nga iniciativat e administratës Trump për reduktimin drastik të madhësisë së qeverisë federale, të udhëhequra nga Departamenti për Efiçencë Qeveritare (DOGE), i cili drejtohet nga miliarderi Elon Musk dhe synon pushime masive dhe shkurtime të thella buxhetore.
