Në Ditën Ndërkombëtare të Punëtorëve, kreu i Partisë së Lirisë, Ilir Meta, ka cilësuar gjendjen e punëtorëve në Shqipëri si dramatike dhe të përkeqësuar nga politikat e qeverisë aktuale. Ai akuzon qeverinë se ka braktisur punëtorët, duke i lënë në një marrëdhënie shfrytëzimi, pa kontrata të rregullta, pa sigurime shëndetësore apo kontribute pensioni.
Në një deklaratë për mediat, Meta tha: “Sot, më 1 Maj, të gjithë ne nuk mund të harrojmë kurrë se me punën, mundin dhe energjinë e tyre, punëtorët kanë një kontribut thelbësor për zhvillimin, mirëqenien dhe përparimin e vendit, si dhe për përballimin e situatave më të vështira ekonomike, me të cilat Shqipëria është përballur ndër vite”. Ai shtoi se “mjerisht, edhe ky 1 Maj i gjen punëtorët në Shqipëri me nivelin më të ulët të pagës në Ballkan dhe në Europë”.
Meta theksoi se fuqia punëtore më e kualifikuar largohet masivisht për shkak të kushteve të këqija të punës, mungesës së vlerësimit të meritokracisë dhe mungesës së shpresës. Ai e cilësoi punën e keqpaguar, me orë të gjata, pa kontrata të rregullta dhe kontribute pensioni, pa sigurim shëndetësor dhe të drejta për pushim me pagesë, si një situatë kritike që Narkoqeveria nuk po e adreson.
Në përgjigje të kësaj situate, Meta ka prezantuar programin e Partisë së Lirisë, “Shqipëria Madhështore”, i cili synon të shpërblejë punën dhe njerëzit e punës në mënyrë dinjitoze, të mbështesë prodhimin vendas dhe të garantojë zhvillim të qëndrueshëm ekonomik. Ai tha: “Në Shqipërinë Madhështore, 1 Maji do të jetë realisht një ditë feste dhe jo më një ditë trishtimi”.
Partia e Lirisë është regjistruar zyrtarisht për të marrë pjesë në zgjedhjet parlamentare të 11 majit 2025, dhe Meta ka vendosur të kandidojë në listën e hapur të Tiranës për koalicionin “Partia Demokratike-Aleanca për Shqipërinë Madhështore”. Ky koalicion do të jetë nën logon e Partisë Demokratike dhe do të paraqesë një listë shumëemërore kandidatëve, e cila do të miratohet nga Sali Berisha, lideri i PD-së.
Meta ka bërë thirrje për një mobilizim të madh të opozitës dhe për një pjesëmarrje masive të qytetarëve në zgjedhjet e 11 majit, duke theksuar se kjo është një mundësi historike për të sjellë ndryshimin në Shqipëri.
