Presidenti rus Vladimir Putin shpalli një armëpushim të shkurtër për festën e Pashkëve në luftën me Ukrainën, një deklaratë që u prit me skepticizëm nga Kievi, ndërsa lufta ka hyrë në një fazë vendimtare dhe negociatat e ndërmjetësuara nga SHBA-të po ngecin.
Putin njoftoi se “të gjitha veprimet luftarake” do të ndalen nga ora 18:00 me orën e Moskës të shtunën (11:00 ET) deri në mesnatën e së hënës (5 pasdite të dielën ET). “Ne supozojmë se pala ukrainase do të ndjekë shembullin tonë,” tha ai, duke shtuar se armëpushimi do ta ndihmonte Rusinë të vlerësonte sinqeritetin e Kievit për një armëpushim të mundshëm.
Edhe pse Ukraina nuk e hodhi poshtë hapur këtë propozim, zyrtarët në Kiev e bënë të qartë se nuk i besojnë deklaratave të Putinit, duke nënvizuar se Rusia ka refuzuar të pranojë një propozim të SHBA-ve për një armëpushim 30-ditor, me të cilin Ukraina kishte rënë dakord.
“Fatkeqësisht, kemi një histori të gjatë me deklarata të Putinit që nuk përputhen me veprimet e tij. Rusia mund të pranojë në çdo moment një armëpushim të plotë dhe të pakushtëzuar 30-ditor, i cili ka qenë në tryezë që nga marsi,” shkroi ministri i Jashtëm ukrainas, Andrii Sybiha, në rrjetin X.
Koha e njoftimit të armëpushimit ngjalli gjithashtu dyshime ai erdhi një ditë pasi administrata Trump sinjalizoi se po i mbaronte durimi me të dyja palët, dhe vetëm disa orë pas njoftimit nga Ministria e Mbrojtjes së Rusisë se forcat e saj kishin zmbrapsur trupat ukrainase nga një prej pikave të fundit të tyre në rajonin Kursk të Rusisë, ku Ukraina kishte kryer një inkursion të papritur një vit më parë.
Menjëherë pas njoftimit të Putinit, në Kiev dhe disa rajone të tjera u dëgjuan sirenat e sulmit ajror, ndërsa administrata ushtarake e qytetit paralajmëroi për një sulm me dron nga Rusia dhe u kërkoi banorëve të qëndronin në strehimore deri në përfundim të alarmit.
Andrii Kovalenko, drejtues i Qendrës së Ukrainës për Kundër-Dezinformimin, deklaroi në Telegram në orën 19:00 me orën lokale se “rusët vazhdojnë të qëllojnë në të gjitha drejtimet”. Aktualisht, Moska dhe Kievi ndodhen në të njëjtën zonë kohore.
Trupat ukrainase në tre zona të ndryshme përgjatë vijës së frontit thanë për CNN se deri në orën 20:00 të së shtunës nuk kishte asnjë shenjë të ndalimit të luftimeve.
Presidenti ukrainas Volodymyr Zelensky reagoi menjëherë pas deklaratës së Putinit, duke e quajtur njoftimin “një përpjekje tjetër të Putinit për të luajtur me jetë njerëzish”.
“Në këtë moment, alarmet për sulm ajror po bien në të gjithë Ukrainën. Në orën 17:15, u zbuluan dronë sulmues rusë në hapësirën tonë ajrore,” shkroi Zelensky në X. “Dronët në qiell tregojnë qëndrimin e vërtetë të Putinit ndaj Pashkëve dhe jetës njerëzore,” shtoi ai.
Në postimin e tij nuk u bë e qartë nëse Ukraina do ta pranonte apo jo armëpushimin. Nuk ka pasur ndalesa të luftimeve që prej fillimit të pushtimit të plotë nga Rusia në shkurt 2022. CNN i është drejtuar presidencës ukrainase për një koment zyrtar.
Por njoftimi i papritur i Putinit dhe kohëzgjatja shumë e shkurtër e armëpushimit i dhanë pak hapësirë Kievit për t’u përgatitur apo për të manovruar.
