Presidenti i Ukrainës, Volodymyr Zelensky, i ka bërë një ftesë publike Donald Trump-it për të vizituar vendin e tij, përpara se të ndërmerren hapa drejt një marrëveshjeje paqeje me Rusinë.
“Ju lutem, përpara çdo vendimi apo negociate, ejani të shihni njerëzit, civilët, luftëtarët, spitalet, kishat, fëmijët e shkatërruar apo të vrarë,” tha Zelensky në një intervistë për emisionin 60 Minutes të CBS.
Intervista është regjistruar përpara sulmit rus me raketë balistike në qytetin Sumy, ku humbën jetën 34 persona dhe u plagosën 117 të tjerë.
Moska ka deklaruar se objektivat e saj janë vetëm caqe ushtarake apo të lidhura me ushtrinë, ndërsa Trump është shprehur se i ishte thënë se sulmi ishte një gabim, pa specifikuar se kush ia kishte thënë këtë.
Ndërkohë, kancelari në pritje i Gjermanisë, Friedrich Merz, e ka quajtur sulmin një “krim të rëndë lufte”.
Merz u shpreh për transmetuesin publik ARD: “Ishte një akt perfid… dhe është një krim i rëndë lufte, i qëllimshëm dhe i paramenduar.”
Sulmi ndodhi në një moment kur SHBA-ja, aleati më i madh ushtarak i Ukrainës, po përpiqet të negociojë për t’i dhënë fund luftës që po zgjat tashmë katër vjet, nën udhëheqjen e Trump-it.
I pyetur për sulmin, presidenti amerikan e quajti “të tmerrshëm” dhe tha se kishte dëgjuar që “ishte bërë një gabim”, por nuk dha më shumë hollësi.
I dërguari i posaçëm i Trump-it për Ukrainën, gjenerali në pension Keith Kellogg, deklaroi se sulmi kishte kaluar “çdo kufi të ndershmërisë”.
Megjithatë, ende mbetet e paqartë nëse Trump do ta pranojë ftesën e Zelenskyt.
Sekretari i Thesarit të SHBA-së, Scott Bessent, është i vetmi anëtar i nivelit të lartë i ekipit të Trump-it që ka vizituar Kievin deri tani.
Vizita e tij kishte për qëllim presionin mbi Zelenskyn që të nënshkruante një kontratë të favorshme për Uashingtonin, që do ta lejonte SHBA-në të merrte burimet minerare të Ukrainës në këmbim të ndihmës ushtarake. Zelensky refuzoi.
Presidenti ukrainas ka theksuar se Rusia vazhdon të godasë civilët ndërkohë që Trump po përpiqet të përmirësojë marrëdhëniet me Moskën në kërkim të një armëpushimi.
I dërguari i posaçëm amerikan, Steve Witkoff, tashmë ka zhvilluar tri takime me presidentin rus Vladimir Putin, ndërkohë që Kievi ka shprehur shqetësimin se Moska do të përfitojë nga këto përpjekje për të fituar kohë dhe për të vazhduar pushtimin e territorit ukrainas.
Liderët evropianë kanë dënuar ashpër sulmin në Sumy. Kancelari në largim i Gjermanisë, Olaf Scholz, tha se sulmi tregoi “sa vlejnë pretendimet e Rusisë për paqe”. Presidenti francez Emmanuel Macron e akuzoi Rusinë për “mosrespektim të hapur të jetës njerëzore, të ligjit ndërkombëtar dhe të përpjekjeve diplomatike të presidentit Trump”. Ai shtoi: “Duhen masa të forta për të imponuar një armëpushim ndaj Rusisë.”
Presidentja e Komisionit Evropian, Ursula von der Leyen, e cilësoi sulmin “barbar”, duke shtuar: “Rusia ka qenë dhe mbetet agresori, në shkelje flagrante të ligjit ndërkombëtar. Masa të forta janë urgjentisht të nevojshme për të siguruar një armëpushim. Evropa do të vazhdojë të punojë me partnerët e saj dhe të mbajë presionin mbi Rusinë derisa të arrihet një paqe e drejtë dhe e qëndrueshme, sipas kushteve të Ukrainës.”
Kryeministri britanik Sir Keir Starmer deklaroi se ishte “i tmerruar nga sulmet e tmerrshme të Rusisë ndaj civilëve në Sumy.”
