Kancelari gjerman Olaf Scholz ka deklaruar se “kufijtë nuk duhet të zhvendosen me forcë” pas një takimi me kryeministren daneze, Mette Frederiksen, që kishte për qëllim të tregonte unitetin evropian ndërsa Donald Trump shton presionin për të marrë kontrollin e Groenlandës.
Kryeministrja daneze u takua me Scholz në Berlin para takimeve të planifikuara me presidentin francez Emmanuel Macron në Paris dhe sekretarin e përgjithshëm të NATO-s, Mark Rutte, në Bruksel, përcjell The Guardian.
Trump ka deklaruar fundjavën e kaluar: “Mendoj se do ta kemi [Groenlandën]” dhe raportohet se ka kërcënuar Danimarkën me tarifa për këtë territor danez.
Në një konferencë të përbashkët për shtyp në Berlin, Scholz dhe Frederiksen nuk e përmendën direkt Trump-in apo Groenlandën, por çështja dukej se ishte në mendjet e tyre.
Duke folur për pushtimin rus të Ukrainës në vitin 2022 dhe rëndësinë e “paprekshmërisë së kufijve si një parim themelor i së drejtës ndërkombëtare,” Scholz theksoi:
“Ky parim duhet të zbatohet për të gjithë. E kam bërë të qartë këtë disa ditë më parë. Kufijtë nuk duhet të zhvendosen me forcë.” Duke kaluar në anglisht, ai shtoi: “Për këdo që i përket.”
Frederiksen tha se Evropa po përballet me një “realitet më të pasigurt” që kërkon bashkëpunim më të madh:
“Na duhet një Evropë më e fortë dhe më e vendosur, që qëndron gjithnjë e më shumë në këmbët e saj, e aftë për të mbrojtur dhe promovuar interesat evropiane. Duhet të marrim më shumë përgjegjësi për sigurinë tonë.”
Udhëheqësit e BE-së do të mbajnë samitin e tyre të parë të dedikuar për mbrojtjen të hënën e ardhshme, për të diskutuar mbi financimet dhe aftësitë e reja ushtarake.
Mbrojtja ka marrë rëndësi më të madhe që prej pushtimit të plotë rus të Ukrainës, ndërsa rikthimi i Trump-it, i cili më parë ka thënë se do të inkurajonte Rusinë të sulmonte aleatët e NATO-s që nuk paguajnë pjesën e tyre të “drejtë,” e ka bërë çështjen edhe më urgjente.
Deri tani, shumica e liderëve të BE-së kanë shmangur komentet direkte mbi deklaratat provokuese të Trump-it për Groenlandën, një strategji e qëllimshme. Një zyrtar i lartë i BE-së tha se është vendosur të mos përgjigjen për të mos përshkallëzuar situatën.
Në 24 orët e fundit, qeveria daneze ka njoftuar disa masa, përfshirë një marrëveshje prej 14.6 miliardë korona daneze (1.64 miliardë paund, 2.04 miliardë dollarë) për të përmirësuar mbikëqyrjen dhe ruajtjen e sovranitetit në Groenlandë dhe Ishujt Faroe.
Planet përfshijnë tre anije të reja Arktike që mund të mbajnë helikopterë dhe dronë, dy dronë me rreze të gjatë për imazhe të detajuara dhe kapacitete të përmirësuara satelitore për monitorimin e Arktikut dhe Atlantikut të Veriut.
Gjithashtu, një iniciativë për të trajtuar racizmin ndaj banorëve të Groenlandës në Danimarkë ka alokuar 35 milionë korona shtesë për katër vitet e ardhshme.
Groenlanda, e pozicionuar strategjikisht mes SHBA-së dhe Evropës, po shfaqet si një fushëbetejë gjeopolitike, me fuqitë e mëdha që konkurrojnë për burimet minerale dhe elementet e rralla që janë thelbësore për teknologjitë e gjelbra. Në rajonin më të gjerë të Arktikut, Kina dhe Rusia po thellojnë bashkëpunimin ushtarak, ndërsa rrugë të reja tregtare po hapen për shkak të shkrirjes së akullit.
