Një injeksion i ri gjashtëmujor kundër HIV-it, i quajtur lenacapavir, është cilësuar si më i afërti që bota ka ardhur ndonjëherë ndaj një vaksine kundër virusit të SIDA-s.
Në një studim mbi gratë, injeksioni rezultoi 100% efektiv në parandalimin e infeksioneve, ndërsa rezultatet e publikuara së fundmi tregojnë efektivitet të ngjashëm edhe te burrat.
Prodhuesi Gilead ka deklaruar se do të lejojë shitjen e versioneve gjenerike të lira në 120 vende të varfra me shkallë të lartë të HIV-it, kryesisht në Afrikë, Azinë Juglindore dhe Karaibe, sipas AP.
Megjithatë, Amerika Latine, ku shkalla e infeksioneve është më e ulët por në rritje, është përjashtuar nga kjo marrëveshje, duke shkaktuar shqetësime për humbjen e një mundësie të rëndësishme për frenimin e sëmundjes.
“Ky është një zhvillim i paparë dhe shumë më superior ndaj metodave ekzistuese të parandalimit,” tha Winnie Byanyima, drejtoreshë e UNAIDS, duke shtuar se sukses i luftës kundër SIDA-s varet nga shpërndarja e këtij ilaçi në vendet me rrezik të lartë.
Në raportin e UNAIDS për Ditën Botërore të SIDA-s, thuhet se numri i vdekjeve nga SIDA në vitin 2023 (rreth 630,000) ishte më i ulëti që nga viti 2004, duke treguar një mundësi historike për t’i dhënë fund epidemisë.
Lenacapavir, i njohur si Sunlenca, përdoret tashmë për trajtimin e HIV-it në SHBA, Kanada dhe Evropë, dhe Gilead planifikon të kërkojë miratim për përdorim si masë parandaluese.
Ekspertët theksojnë se injeksioni do të ishte veçanërisht i dobishëm për grupe të margjinalizuara si punonjës seksi, gra të reja dhe burra homoseksualë, të cilët shpesh kanë frikë të kërkojnë kujdes.
Në Meksikë, pjesëmarrës në një studim mbi Sunlenca treguan se injeksioni ishte një mundësi e rëndësishme për t’iu shmangur diskriminimit.
Megjithatë, autoritetet shëndetësore ende nuk kanë komentuar mbi planin për ta përfshirë këtë ilaç në sistemin publik.
Organizatat avokuese në vende si Peruja, Argjentina dhe Brazili kanë kërkuar nga Gilead që të lejojë prodhimin e versioneve gjenerike në Amerikën Latine, ku infeksionet po rriten në grupe të caktuara si komunitetet LGBTQ+.
Ekspertët, përfshirë Dr. Salim Abdool Karim nga Afrika e Jugut, kanë vlerësuar Sunlenca si një ilaç tejet efektiv për parandalimin e HIV-it, por sfida mbetet shpërndarja globale e tij.
