Kreu i grupit parlamentar të PD, Gazment Bardhi, i është përgjigjur kryeministrit Edi Rama, duke e akuzuar se është përgjegjës për vonesën e negociatave me Bashkimin Evropian.
Sipas Bardhit, Shqipëria ndodhet me të paktën disa muaj prapa në procesin e integrimit për shkak të vendimeve të qeverisë, veçanërisht në lidhje me çështjen “Balluku” dhe raportin me SPAK-un.
Ai theksoi se vendet anëtare të BE-së kanë shtuar kërkesat dhe kushtet për Shqipërinë.
Reagimi:
Edi Rama mjaft i gënjeve dhe u talle me shqiptarët! Po të mos ishte vota jote kundër SPAK-ut dhe pro Belinda Ballukut, Shqipëria sot do të kishte nisur mbylljen e kapitujve për negociatat e anëtarësimit.
Kjo s’po ndodh, jo për faj të opozitës, por se nuk ua shet dot sapunin për djathë vendeve anëtare të BE-së. Sot jemi në kushtet kur Shqipërisë po i shtohen kushtet në negociatat për anëtarësim, sepse, kryeministri/avokat i Belinda Ballukut dhe kryeministri/ortak i Ergys Agasit ka thyer në mes besimin e partnerëve për sundimin e shtetit të së drejtës dhe barazinë para ligjit.
Që çështja “Balluku” ishte një test për Shqipërinë në rrugën e integrimit, nuk e tha opozita në Tiranë. E tha Europa! Dhe sot, jemi me të paktën 4 muaj vonesë me negociatat, jo për faj të opozitës, siç mashtron paturpësisht Edi Rama, por se ai zgjodhi Belindën, pra karrigen e tij, para integrimit europian dhe interesit të shqiptarëve.
Për dy çështje kryesore kanë interes vendet anëtare:
1. Korrupsionin e Belinda Ballukut.
2. Skandalin e AKSHI-t.
Për të dyja këto, deri tani, janë dërguar 49 pyetje dhe përgjigjet e dhëna nga Komisioni Europian akoma nuk i kanë bindur vendet anëtare që të hapin dritën jeshile.
Pse nuk bën transparencë Edi Rama për këtë fazë delikate të procesit të negociatave, por vazhdon me retorikën e zakonshme, të mbushur me urrejtje dhe shpifje ndaj opozitës?
Pse nuk u tregon shqiptarëve se në mbledhjen e fundit të datës 9 Prill, 7 shtete anëtare kanë deklaruar se do të dërgojnë propozime të tjera shtesë për Shqipërinë?
Pse nuk u thotë Edi Rama shqiptarëve se 4 shtete anëtare, me shqetësim të shtuar pas votës së tij në mbrojtje të Ballukut, kanë deklaruar se do t’i miratojnë piketat e ndërmjetme, (detyrat që duhen bërë gjatë negociatave), por vetëm me kusht që tek piketat mbyllëse (kriteret finale për të mbyllur një kapitull) të vendosen kushte të përforcuara dhe më të gjera për Shqipërinë?
Besoj që kujtdo i kujtohet qendrimi i Edi Ramës në fushatë se “nuk mund të humbim as edhe një ditë kohë me negociatat, sepse dera e BE-së mund të mbyllet”. Sot, ka vetëm një përgjegjës për vonesën e negociatave: Edi Rama. Sot, ka vetëm 1 të vërtetë për integrimin: Me votën kundër SPAK-ut për rastin “Balluku”, Edi Rama, do t’i kushtojë Shqipërisë jo një ditë e dy, por të paktën 6 muaj vonesë me integrimin!
