Një eksperiment inovativ në Itali ka treguar se përdorimi i robotikës mund të përmirësojë ndjeshëm koordinimin dhe saktësinë muzikore mes artistëve. Studiuesit pajisën violinistë profesionistë me ekzoskelete të lehta robotike, të vendosura në krahun që përdoret për harkun, duke testuar ndikimin e tyre në performancë, përcjell Euronews.
Sipas studimit të publikuar në revistën shkencore Science Robotics, pajisjet robotike jepnin sinjale të lehta haptike, të cilat ndihmonin muzikantët të sinkronizonin më mirë lëvizjet mes tyre.
Një nga studiuesit, Francesco Di Tommaso, shpjegoi se eksperimenti synonte të kuptonte nëse zëvendësimi i komunikimit vizual me ndjesi fizike do të ndikonte në koordinim. Ai theksoi se në disa raste violinistët nuk mund ta shihnin njëri-tjetrin, por merrnin sinjale përmes pajisjeve, gjë që rezultoi në përmirësim të dukshëm të sinkronizimit.
Gjatë testimeve, muzikantët performuan në katër kushte të ndryshme: vetëm me dëgjim, me dëgjim dhe shikim, me shikim të bllokuar por me ekzoskelet aktiv, si dhe me të gjitha format e feedback-ut të kombinuara. Lëvizjet e tyre u monitoruan përmes kamerave infra të kuqe dhe sensorëve që regjistronin këndet e krahëve dhe forcën e aplikuar.
Rezultatet treguan se përdorimi i feedback-ut haptik përmirësoi jo vetëm koordinimin fizik, por edhe cilësinë e performancës muzikore. Edhe pse disa pjesëmarrës raportuan ndjesi të lehtë parehatie, ndikimi në sinkronizim ishte pozitiv.
Profesor Domenico Formica, i përfshirë në studim, theksoi se kjo teknologji mund të ketë përdorime më të gjera përtej muzikës, përfshirë rehabilitimin fizik, ku pacientët dhe terapistët mund të ndërveprojnë përmes sistemeve të ngjashme për të përmirësuar procesin e rikuperimit.
Ky zhvillim hap rrugë të reja për ndërthurjen e artit me teknologjinë, duke treguar se robotika mund të luajë një rol kyç edhe në fusha kreative si muzika.
