Izrael ka deklaruar se ka eliminuar një nga figurat më të larta të sigurisë në Iran, Ali Larijani, gjatë një sulmi ajror në Teheran, ndërsa janë goditur edhe drejtues të rëndësishëm të forcave paramilitare dhe grupeve të lidhura me Iranin.
Sipas Forcat e Mbrojtjes së Izraelit, Larijani, sekretar i Këshillit Suprem të Sigurisë Kombëtare të Iranit, u vra në një objekt të sigurt në kryeqytet gjatë sulmeve të natës, shkruan Ynet.
Lajmi u konfirmua edhe nga ministri izraelit i Mbrojtjes, Israel Katz, ndërsa deri më tani nuk ka reagim zyrtar nga autoritetet iraniane.
Në një operacion të veçantë, ushtria izraelite tha se ka eliminuar edhe Gholamreza Soleimani, komandantin e forcës Basij, si dhe zëvendësin e tij Qasim Qureshi.
Sipas ushtrisë, sulmi ndaj Soleimanit u krye në Teheran mbi bazën e informacioneve të inteligjencës dhe ai kishte drejtuar këtë njësi për gjashtë vitet e fundit.
Forcat Basij janë pjesë e aparatit të sigurisë së brendshme të Iranit dhe kanë luajtur rol kyç në shtypjen e protestave, duke përfshirë arrestime dhe përdorim force ndaj civilëve gjatë valëve të fundit të pakënaqësisë.
Ndërkohë, sipas burimeve të cituara, Izraeli ka goditur edhe një kompleks nëntokësor në qytetin Qom, ku dyshohej se ndodheshin drejtues të Xhihadi Islamik Palestinez, përfshirë zëvendëskomandantin Akram al-Ajouri dhe drejtuesin e krahut ushtarak Mohammed al-Hindi, megjithëse nuk ka konfirmim zyrtar për viktima.
Shefi i Shtabit të Përgjithshëm të ushtrisë izraelite, Eyal Zamir, deklaroi se operacionet e fundit kanë dhënë “rezultate të rëndësishme kundër terrorizmit” dhe mund të ndikojnë në rrjedhën e përgjithshme të konfliktit.
Ai theksoi se sulmet kanë në shënjestër strukturat e Garda Revolucionare Islamike dhe mekanizmat e sigurisë së regjimit iranian.
Sipas tij, eliminimi i drejtuesve si Soleimani përbën një goditje të rëndë për strukturat e komandës dhe kontrollit të sigurisë në Iran, ndërsa operacionet izraelite po shtrihen në disa fronte, përfshirë edhe Liban, ku raportohet për sulme ndaj objektivave të lidhura me Hezbollah.
Zhvillimet vijnë në një moment përshkallëzimi të konfliktit në rajon, me Izraelin që po zgjeron fushatën e tij kundër drejtuesve, infrastrukturës ushtarake dhe aleatëve të Iranit në Lindjen e Mesme.
