Ukraina dhe Rusia shkëmbyen nga 200 të burgosur lufte secila të enjten në shkëmbimin e tyre më të fundit, njoftuan zyrtarët nga të dyja palët, pavarësisht bllokimit të negociatave të mbështetura nga SHBA-ja për t’i dhënë fund konfliktit katërvjeçar.
Kievi dhe Moska kanë kryer shkëmbime të rregullta të të burgosurve të luftës (POW) gjatë gjithë luftës, duke u angazhuar gjatë bisedimeve të fundit në Gjenevë për një raund të ri shkëmbimesh të tilla, edhe pse negociatat mbeten të bllokuara për çështjen e territorit, shkruan Reuters.
“Sa herë që njerëzit tanë kthehen në shtëpi, kjo vërteton se Ukraina po punon për t’i kthyer të gjithë. Askush nuk është harruar,” tha Presidenti Volodymyr Zelenskiy në platformën X. “Ne përfshijmë ndërmjetësues. I jam mirënjohës gjithkujt që ndihmon Ukrainën. Falënderoj Shtetet e Bashkuara për mbështetjen e tyre në bërjen të mundur të këtij shkëmbimi.”
Disa nga të burgosurit e luftës të liruar të enjten ishin kapur që në kohën e rrethimit të Mariupolit nga Moska në fillim të vitit 2022, shtoi Zelenskiy.
Të afërmit mes lotësh përshëndetën njerëzit e tyre të dashur – shumë prej tyre të mbështjellë me flamuj ukrainas – ndërsa ata dilnin nga një autobus që kishte mbërritur në një vendndodhje të pazbuluar, nën thirrjet “Mirë se vini!”.
Dy palët pritet të shkëmbejnë edhe 300 të burgosur të tjerë secila në ditën e dytë të shkëmbimeve të premten, deklaruan zyrtarët.
