Pesëmbëdhjetë avionë ushtarakë amerikanë janë larguar nga bazat Rota dhe Morón në jug të Spanjës, pasi Shtetet e Bashkuara dhe Izraeli nisën sulmet e fundjavës ndaj Iranit, sipas hartave të publikuara nga faqja e monitorimit të fluturimeve FlightRadar24.
Ministri i Jashtëm spanjoll, Jose Manuel Albares, deklaroi se Spanja nuk do të lejojë që bazat e saj ushtarake – të cilat operohen bashkërisht nga SHBA dhe Spanja, por janë nën sovranitetin spanjoll – të përdoren për sulme ndaj Iranit, veprime që Madridi i ka dënuar.
Të paktën shtatë nga avionët rezultojnë të kenë zbritur në bazën ajrore Ramstein në Gjermani, sipas të dhënave të FlightRadar24, përcjell Reuters.
Edhe Britania fillimisht kishte refuzuar përdorimin e bazave të saj për sulme ndaj Iranit, por të dielën kryeministri Keir Starmer autorizoi përdorimin e tyre për atë që u përshkrua si “vetëmbrojtje kolektive”.
Qëndrimi i Spanjës dhe dënimi i fortë i veprimeve amerikano-izraelite nga kryeministri socialist Pedro Sanchez e vendosin vendin në një pozicion të veçantë në rajon, duke rrezikuar të tensionojnë më tej marrëdhëniet me Uashingtonin.
“Bazat spanjolle nuk po përdoren për këtë operacion dhe nuk do të përdoren për asgjë që nuk përfshihet në marrëveshjen me Shtetet e Bashkuara apo që nuk është në përputhje me Kartën e Kombeve të Bashkuara,” tha Albares për televizionin spanjoll Telecinco.
Ministrja e Mbrojtjes, Margarita Robles, sqaroi se avionët – kryesisht cisterna ajrore për furnizim me karburant, përfshirë modelin Boeing KC-135 “Stratotanker” – ishin të stacionuar në mënyrë të përhershme në Spanjë.
Sipas të dhënave të FlightRadar24, nëntë avionë cisternë u nisën të dielën nga baza ajrore Morón në jug të Spanjës drejt Gjermanisë. Dy fluturime u nisën nga Rota, një bazë detare me pistë ajrore, drejt jugut të Francës, ndërsa katër fluturime të tjera u larguan nga Rota pa u bërë publike destinacionet e tyre.
