Instituti Tony Blair (TBI) ka ofruar trajnime dhe konsulencë për teknokratët palestinezë të emëruar për të administruar Gazën nën “Bordin e Paqes” të presidentit të SHBA-së, Donald Trump.
Sipas personave që kanë njohuri mbi situatën, një ekip nga instituti i ish-kryeministrit britanik zhvilloi sesione në Kajro për anëtarët e Komitetit Kombëtar për Administrimin e Gazës (NCAG) në mes të janarit, periudhë kur ky organizëm po krijohej. Takimet përfshinin trajnime për udhëheqjen dhe diskutime mbi prioritetet për qeverisjen e Gazës, ndërkohë që stafi i TBI-së ishte i pranishëm në hotelin në Kajro ku anëtarët e komitetit jetojnë dhe punojnë.
Burimet pranë institutit pohuan se TBI po bën gjithçka që mundet për të mbështetur NCAG-në, duke e financuar këtë nismë aktualisht nga fondet e veta. Blair ka qenë i përfshirë në hartimin e planeve për Gazën e pasluftës për më shumë se një vit dhe është emëruar në poste të larta në Bordin e Paqes, i cili ka për detyrë zbatimin e planit të paqes të presidentit amerikan.
Stafi i TBI-së ka marrë pjesë më parë në diskutime me konsulentë të BCG-së dhe biznesmenë izraelitë mbi një projekt që imagjinonte një “Rivierë të Gazës” pas luftës, duke përfshirë nisma tregtare të bazuara në transaksione me kriptomonedha dhe “zona ekonomike speciale” me taksa të ulëta.
Ndër idetë e propozuara ishte edhe një plan i udhëhequr nga biznesmenë izraelitë që përfshinte pagimin e gjysmë milioni palestinezëve për t’u larguar nga Gaza, por TBI deklaroi se nuk e ka zhvilluar apo mbështetur këtë plan zhvendosjeje. NCAG është një trupë prej 15 personash e formuar për të drejtuar shërbimet publike të përditshme në Gazë si pjesë e planit të Trump-it.
Ky komitet, i cili aktualisht është i vendosur në Egjipt dhe ka pak fuqi vendimmarrëse autonome, varet nga Bordi i Paqes dhe do mbikëqyret nga Nickolay Mladenov, një diplomat bullgar që shërben si “përfaqësues i lartë për Gazën”.
Komiteti Kombëtar për Administrimin e Gazës është i ngarkuar me administratën civile dhe do të mbikëqyret nga Nickolay Mladenov
Ndërsa NCAG ngarkohet me administrimin civil, Bordi i Paqes mbikëqyr të gjitha aspektet e së ardhmes së Gazës sipas planit 20-pikësh të Trump-it, përfshirë sigurinë dhe rindërtimin, me synimin për të ndërtuar projekte imobiliare, komplekse industriale dhe kulla turistike bregdetare në enklavën e shkatërruar.
Blair, i cili shërbeu si i dërguar për Lindjen e Mesme pas largimit nga Downing Street, u emërua në bordet ekzekutive të Bordit të Paqes krah figurave si Jared Kushner dhe Steve Witkoff, arkitektët kryesorë të planit të Trump-it. Ata punojnë nën Bordin kryesor të Paqes, i cili kryesohet nga vetë Trump, me udhëzimin për të vënë në punë planin presidencial.
Ndonëse disa shtete arabe dhe myslimane ishin rezistente ndaj emërimit të Blair-it për shkak të dëmtimit të reputacionit nga mbështetja e tij për pushtimin e Irakut në vitin 2003, ai mbetet një figurë kyçe. Vlen të theksohet se, megjithëse NCAG përbëhet nga teknokratë palestinezë, nuk ka asnjë palestinez në Bordin e Paqes apo në bordet e tij ekzekutive.
Në mbledhjen inauguruese në Uashington në shkurt, Blair deklaroi se qeverisja e Gazës ka pasur mungesë rruge drejt prosperitetit, por theksoi potencialin e saj të madh bregdetar dhe popullsinë e re, duke premtuar krijimin e institucioneve publike efektive dhe një mjedis ku ndërmarrësia lulëzon.
VINI RE: Ky material është ronësi intelektuale e Financial Times
