Kryetari i Partia Demokratike e Shqipërisë, Sali Berisha, ka reaguar menjëherë në rrjetet sociale pas vendimit të kryeministrit Edi Rama për të shkarkuar Belinda Balluku dhe për të bërë ndryshime në kabinetin qeveritar.
Berisha e cilësoi këtë lëvizje si një përpjekje të Ramës për të “shpëtuar lëkurën”, duke argumentuar se vendimi nuk ndryshon thelbin e situatës politike. Sipas tij, zhvillimet e fundit do ta shtyjnë opozitën të vijojë protestat kundër qeverisë.
Ai i ka përshkruar mobilizimet e opozitës si “kryengritje paqësore”, ndërsa ka paralajmëruar për vazhdimin e aksionit opozitar. Në reagimin e tij, Berisha i ka bërë thirrje Ramës të japë dorëheqjen, duke theksuar se në të kundërt do të përballet me kundërshtimin e vazhdueshëm të opozitës — një qëndrim që ai e ka artikuluar edhe më parë në deklaratat e tij publike.
“Lëvizja e fundit e Edi Ramës është një lëvizje me të cilën kërkon të shpëtojë lëkurën e tij. Por është një lëvizje, e cila fton qytetarët shqiptarë, opozitën shqiptare të vazhdojë fuqishëm protestat, pasi kryengritja paqësore e shqiptarëve synon, ka si qëllim kryesor madhor shpëtimim e Shqipërisë nga Edi Rama dhe jo-kukullat e tij.
Me lëvizjen e tij, ai përpiqet të mashtrojë njerëzit, në një kohë kur ai vet është kreu i organizatës kriminale që drejton. Ndaj dhe, i kërkoj dorëheqjen e tij të menjëhershme, përndryshe do përballet me opozitën dhe mbarë popullin shqiptar.
Edi Rama, nuk ka më pranverë për qeverinë tënde dhe për ty. Je shkaku i të gjitha problemeve të mëdha me të cilat përballet sot shqiptarët. Je mater matrix e kësaj të keqe të madhe që ka kapluar qënien, shpirtin, trupin e Shqipërisë”, tha Berisha.
