Toka publike pranë asaj që dikur ishte ferma “Zorro Ranch” e Jeffrey Epstein-it, është vendosur nën hetim penal pasi një e-mail i sapopublikuar pretendon se dy vajza u varrosën atje pasi u vranë gjatë akteve të dhunshme seksuale, raportoi Reuters të enjten.
Hetimi pason publikimin e “dosjeve Epstein”, që numërojnë mbi 3.5 milionë faqe, të cilat kanë nxitur një valë dorëheqjesh dhe hetimesh të reja në mbarë botën mbi trafikimin e dyshuar njerëzor dhe krime të tjera të lidhura me rrjetin e Epstein-it.
Një fokus kryesor i hetimit është një e-mail i vitit 2019, më parë i klasifikuar, dërguar drejtuesit të radios në Nju Meksiko, Eddy Aragon. Dërguesi, i cili pretendon se është një ish-punonjës i “Zorro Ranch”, thuhet se ka pretenduar se dy vajza të huaja ishin varrosur me urdhër të Epstein-it. Mesazhi raportohet se pretendon se vajzat u varrosën “diku në kodrat jashtë Zorro-s” dhe kishin vdekur “nga mbytja gjatë seksit të dhunshëm”.
Aragon tha se besonte se e-maili ishte legjitim dhe ia përcolli atë FBI-së. Një raport i FBI-së i vitit 2021, i përfshirë në publikimin e fundit, thotë se ai vizitoi zyrën e byrosë për të raportuar një e-mail që ofronte shtatë video abuzimi dhe koordinatat e varrimit në këmbim të një Bitcoin-i.
Epstein e bleu “Zorro Ranch”, e vendosur pranë qytetit Stanley në Nju Meksiko, në vitin 1993 dhe ndërtoi një rezidencë në majë të kodrës. Aty pranë ndodhej një pistë private fluturimi me një hangar dhe pistë helikopterësh. Prona përfshinte gjithashtu një zyrë ferme, një stacion zjarrfikës dhe një garazh të ngrohur me shtatë vende, shkruan Rt.
Departamenti i Drejtësisë i Nju Meksikos njoftoi të enjten se një hetim penal, i mbyllur që në vitin 2019, u rihap pas rishikimit të dosjeve të FBI-së të vulosura më parë, të përfshira në publikimin e fundit. Një zëdhënës i tha Reuters se shteti kishte kërkuar një kopje të pacensuruar të e-mailit të vitit 2019 që përmbante pretendimet dhe se autoritetet “po hetojnë aktivisht këtë pretendim dhe po kryejnë një rishikim më të gjerë në dritën e publikimeve të fundit”.
Prokurorët e shtetit të Nju Meksikos thanë në një deklaratë se rishikimi do fokusohet në ruajtjen e çdo prove të mbetur dhe ndjekjen e fakteve “kudo që ato çojnë”, duke vlerësuar me kujdes çështjet e juridiksionit.
Epstein, i cili u deklarua fajtor në vitin 2008 për nxitje prostitucioni dhe u dënua me 18 muaj burg për përdhunimin e një të miture, u arrestua përsëri në vitin 2019 me akuzat për trafikim njerëzor dhe shfrytëzim të viktimave për prostitucion. Ai vdiq në burg përpara gjyqit të tij. Departamenti i Drejtësisë i SHBA-së ka publikuar gradualisht materialet përkatëse sipas Aktit të Transparencës së Dosjeve Epstein.
