Investitorët nga Turqia, Izraeli, Kina, Irani dhe Shtetet e Bashkuara dominuan miratimet në kuadër të programit grek të rezidencës përmes investimit, i njohur si “Viza e Artë”, gjatë vitit 2025. Rritja e kërkesës lidhet me presionet ekonomike, konfliktet rajonale dhe shqetësimet për sigurinë në vendet e origjinës së aplikantëve.
Sipas të dhënave, gjatë vitit 2025 u miratuan 8,879 leje të reja qëndrimi, gati dyfish krahasuar me 4,535 leje të miratuara në vitin 2024, duke shënuar një rritje prej 95%. Pjesa më e madhe e tyre u përqendrua tek shtetasit e pesë vendeve që rezultuan më aktivë në këtë program.
Burime nga tregu vlerësojnë se profili i këtyre investitorëve shpjegon edhe arsyet pse programet e migrimit përmes investimit përdoren si instrument për sigurimin e një “strehe të sigurt”. Motivacionet kryesore përfshijnë mbrojtjen e pasurisë, stabilitetin politik dhe garantimin e sigurisë për familjet, shkruan Ekathimerini.
Turqia: rritje e fortë mes presioneve ekonomike
Interesi nga Turqia u rrit ndjeshëm që prej vitit 2023, arriti kulmin në 2024 dhe vijoi me ritme të larta edhe në 2025, në një kohë kur inflacioni në Turqi mbeti i lartë. Investitorët turq me të ardhura të konsiderueshme kërkuan alternativa jashtë vendit për të mbrojtur kapitalin e tyre.
Lejet e lëshuara për shtetasit turq u rritën me 160% në vitin 2025, duke arritur në 3,291 miratime, ose 15.9% të totalit, çka i rendit ata si grupin e dytë më të madh përfitues. Investimi në pasuri të paluajtshme në Greqi, me potencial për të ardhura nga qiraja dhe rritje të vlerës në të ardhmen, rezultoi veçanërisht tërheqës. Po ashtu, lëvizja pa viza në zonën Shengen konsiderohet një faktor shtesë nxitës.
Izraeli: ndikimi i luftës në Gaza
Miratimet për investitorët izraelitë u rritën me 91.5%, duke arritur në 636 në vitin 2025. Lufta në Gaza dhe pasiguria e shtuar shtynë shumë familje të kërkojnë alternativa zhvendosjeje në vende më të sigurta. Afërsia gjeografike e Greqisë, prania ekzistuese e komunitetit izraelit në tregun e pronave dhe lidhjet kulturore kanë ndikuar në këtë rritje.
Kina mbetet lider, por me peshë më të ulët relative
Investitorët kinezë vijojnë të përbëjnë grupin më të madh në program, me 9,926 miratime në vitin 2025, ose 47.9% të totalit. Kjo përfaqëson një rritje prej 53.7% krahasuar me vitin 2024. Megjithatë, pesha relative e tyre ka rënë nga nivelet mbi 70% që regjistroheshin në vitet e mëparshme, duke reflektuar diversifikimin e origjinës së aplikantëve.
Irani: rritje mes tensioneve të brendshme
Lejet për shtetasit iranianë u rritën me 52.5%, duke arritur në 816 miratime në vitin 2025. Trazirat e brendshme dhe tensionet politike konsiderohen faktorë kryesorë që kanë shtyrë rritjen e aplikimeve nga ky vend.
Në tërësi, të dhënat për vitin 2025 konfirmojnë se programi grek i “Vizës së Artë” po shndërrohet gjithnjë e më shumë në një instrument strategjik për investitorët që kërkojnë stabilitet ekonomik, siguri juridike dhe akses në hapësirën evropiane.
