Një zyrtar i lartë turk ka rikthyer në vëmendje çështjen e çmilitarizimit të ishujve grekë, vetëm pak ditë para takimit të parashikuar mes kryeministrit grek Kyriakos Mitsotakis dhe presidentit turk Rexhep Tajip Erdogan, që do të zhvillohet këtë të mërkurë në Ankara.
Omer Çelik, zëdhënës i Partisë për Drejtësi dhe Zhvillim (AKP) në pushtet në Turqi, deklaroi se mosmarrëveshjet mes Ankarasë dhe Athinës mund të zgjidhen përmes diplomacisë, por paralajmëroi se raportet mbi armatosjen e ishujve që, sipas Turqisë, duhet të jenë të çmilitarizuar, si dhe deklaratat që ai i cilësoi si “ekstreme” nga ministri grek i Mbrojtjes, Nikos Dendias, krijojnë pasoja në marrëdhëniet dypalëshe.
Çelik akuzoi gjithashtu Greqinë se ka tentuar t’i paraqesë çështjet e saj si probleme të Bashkimit Evropian, duke shtuar se, sipas tij, BE-ja është përfshirë “padrejtësisht” në këtë debat, shkruan Ekathimerini.
Ai e cilësoi vizitën e Mitsotakis në Ankara si një “mundësi të mirë” për të forcuar angazhimin diplomatik dhe për të trajtuar dallimet mes dy vendeve, duke nënvizuar se njohja e mëparshme mes dy liderëve mund të ndihmojë në krijimin e një klime më konstruktive.
“Ne kemi theksuar vazhdimisht se tensionet duhet të shmangen. Le të kthehet Egjeu në një det paqeje dhe jo në një zonë konflikti,” u shpreh Çelik.
Takimi i radhës zhvillohet pas gati dy vitesh mungesë samitesh mes liderëve dhe vjen pas një periudhe marrëdhëniesh relativisht të qeta mes dy vendeve. Bisedimet pritet të përqendrohen te ruajtja e stabilitetit në Detin Egje, mbajtja e hapur e kanaleve të komunikimit dhe vijimi i dialogut dypalësh, pa përfshirjen e palëve të treta.
