Kryetari i Parlamentit të Iranit, Mohammad Bagher Qalibaf, deklaroi të dielën se Republika Islamike tashmë i konsideron të gjitha ushtritë e Bashkimit Evropian si organizata terroriste, në reagim ndaj vendimit të BE-së për të shpallur Gardën Revolucionare Iraniane grup terrorist për shkak të shtypjes së dhunshme të protestave në mbarë vendin, përcjell AP News.
Qalibaf, ish-komandant i Gardës Revolucionare, e bëri njoftimin gjatë një seance parlamentare, ku ai dhe deputetë të tjerë u shfaqën të veshur me uniforma të Gardës, në shenjë mbështetjeje për këtë forcë. Ai e cilësoi vendimin e BE-së si një veprim kundër interesave të vetë Evropës dhe akuzoi bllokun për “bindje të verbër ndaj Shteteve të Bashkuara”.
Vendimi iranian pritet të ketë kryesisht karakter simbolik, pasi Teherani ka përdorur edhe më parë një ligj të vitit 2019 për të shpallur ushtri të huaja si terroriste, në përgjigje të shpalljes së Gardës Revolucionare si organizatë terroriste nga SHBA-ja po atë vit.
Deklarata vjen në një moment tensionesh të larta në Lindjen e Mesme, ndërsa presidenti amerikan Donald Trump po shqyrton mundësinë e një sulmi ushtarak ndaj Iranit. Paralelisht, Irani ka planifikuar stërvitje ushtarake me municione reale në Ngushticën strategjike të Hormuzit, përmes së cilës kalon rreth një e pesta e tregtisë globale të naftës.
Garda Revolucionare, e cila kontrollon edhe arsenalin e raketave balistike të Iranit dhe ka ndikim të gjerë ekonomik, i përgjigjet drejtpërdrejt Udhëheqësit Suprem Ali Khamenei. Gjatë seancës parlamentare, ligjvënësit brohoritën slogane si “Vdekje Amerikës” dhe “Vdekje Izraelit”.
Presidenti Trump ka vendosur dy “vija të kuqe” për veprim ushtarak: vrasjen e protestuesve paqësorë dhe ekzekutimet masive të personave të arrestuar gjatë protestave. Ai ka përmendur gjithashtu shqetësime mbi programin bërthamor iranian, veçanërisht pas luftës 12-ditore mes Izraelit dhe Iranit në qershor, gjatë së cilës SHBA bombardoi tre objekte bërthamore iraniane.
Trump ka refuzuar të konfirmojë nëse ka marrë një vendim përfundimtar për veprime ndaj Iranit, duke deklaruar se Teherani po zhvillon bisedime, por pa garanci për një marrëveshje. Nga ana tjetër, zyrtarë iranianë kanë pohuar se “strukturat për negociata po ecin përpara”, megjithëse nuk ka asnjë shenjë publike për dialog të drejtpërdrejtë mes dy vendeve, diçka që Khamenei e ka përjashtuar vazhdimisht.
