Kryetarja e Komisionit Parlamentar për Kulturën, Ina Zhupa, ka lëshuar akuza të forta ndaj Fondacionit Shqiptaro-Amerikan për Zhvillim (AADF), pas refuzimit të këtij të fundit për t’u paraqitur në një dëgjesë publike lidhur me projektin “TID Durrës”.
Sipas Zhupës, ky bojkot është një dëshmi e qartë se planet e menaxhimit të hartuara nga ky ent privat nuk mund të mbrohen publikisht dhe cënojnë drejtpërdrejt interesin e qytetarëve.
Në dëgjesën e organizuar në orët e paradites morën pjesë banorët e prekur nga projekti, përfaqësues të Bashkisë së Durrësit dhe Ministrisë së Kulturës, por mungesa e AADF-së u cilësua nga Zhupa si një “precedent unik dhe i rrezikshëm”.
Ajo theksoi se shteti shqiptar i ka deleguar një enti privat të drejta mbi pronat publike, pa krijuar asnjë mekanizëm real kontrolli apo transparence, duke krijuar kështu hapësira për abuzime të pakontrolluara.
Zhupa renditi disa nga pasojat që sipas saj po sjell ky model menaxhimi, ku në qendër është mungesa e përgjegjshmërisë para qytetarëve.
Sipas saj, planet për Durrësin po hartohen pa kritere të qarta, duke bërë që qytetarët të humbasin pronat e tyre ndërkohë që askush nuk mban përgjegjësi. Ajo paralajmëroi se ky “fshehje” e fondacionit dëmton rëndë të ardhmen turistike, kulturore dhe urbane të qytetit bregdetar.
Më tej, deputetja e opozitës vuri në dukje se AADF ka marrë në administrim më shumë prona publike se çdo organizatë tjetër e ngjashme në botë, duke operuar me një transparencë minimale.
Sipas Zhupës, asnjë vend serioz nuk do t’ia linte interesin publik në dorë privatit pa një sistem llogaridhënieje, duke e cilësuar situatën aktuale si një rrezik për parimet e shoqërisë demokratike dhe pronën e përbashkët.
