Kuvendi i Shqipërisë ka miratuar në orët e para të mëngjesit të sotëm një paketë të gjerë ndryshimesh ligjore, ku spikasin ndërhyrjet në Kodin Penal dhe rregullat e reja për sistemin e drejtësisë.
Me 85 vota pro nga mazhoranca, një nga risitë më të diskutuara është ashpërsimi i masave për shkeljet rrugore, ku tashmë parkimi dysh nuk do të ndëshkohet vetëm me gjobë, por mund të çojë deri në 1 vit burgim.
Gjatë prezantimit, Ministri i Drejtësisë, Besfort Lamallari, theksoi se këto ndryshime janë pjesë e procesit të integrimit europian dhe synojnë përafrimin e legjislacionit vendas me standardet e Bashkimit Europian.
Një tjetër pikë e miratuar në këtë seancë është dekriminalizimi i shpifjes për punonjësit e medias. Ky ndryshim ligjor u ofron gazetarëve një lloj imuniteti nga procedimet penale për këtë vepër, duke u pozicionuar si një masë për mbrojtjen e lirisë së shprehjes.
Paralelisht me këtë, Kuvendi i dha dritën jeshile edhe ndryshimeve në ligjin për statusin e gjyqtarëve dhe prokurorëve, si dhe projektligjit për organet e qeverisjes në drejtësi, të cilat morën të njëjtin numër votash si Kodi Penal.
Axhenda parlamentare u përmbyll me miratimin e një sërë nismash që prekin sektorë të ndryshëm të jetës publike dhe ekonomisë. Socialistët votuan ligjin për komisionet hetimore dhe atë për mediat audiovizive, ndërkohë që u miratua edhe akti normativ për buxhetin e vitit 2025.
Në fokus të ndryshimeve ishte edhe mbrojtja e territorit dhe mjedisit, përmes ashpërsimit të dënimeve për ndërtimet pa leje dhe për shkaktimin e zjarreve të qëllimshme, krahas rregullave të reja për tregtinë e duhanit.
Në fund të seancës maratonë, deputetët miratuan gjithashtu një sërë marrëveshjesh dhe rregullash për pronësinë intelektuale, lobimin dhe menaxhimin e agjencive të udhëtimit.
Paketa e miratuar përfshiu edhe masa më të rrepta për trajtimin e dhunës ndaj grave dhe dhunës në familje, si dhe rregullimin e import-eksportit të armëve. Kjo seri votimesh shënon një ndryshim të rëndësishëm në kuadrin ligjor shqiptar, duke prekur si sigurinë publike, ashtu edhe funksionimin e institucioneve të drejtësisë.
