Kryeministri i Belgjikës, Bart De Wever, ka paralajmëruar se konfiskimi i aseteve ruse të ngrira në Bashkimin Evropian do të përbënte një “deklaratë lufte” ndaj Rusisë, duke vënë në dukje pasojat e rënda politike, juridike dhe financiare që një hap i tillë mund të sillte për Evropën.
Pas përshkallëzimit të konfliktit në Ukrainë në shkurt të vitit 2022, vendet perëndimore ngrinë rreth 300 miliardë dollarë asete të Bankës Qendrore të Rusisë. Pjesa më e madhe e këtyre fondeve – rreth 216 miliardë dollarë – ndodhen në Euroclear, depozituesi financiar me seli në Belgjikë. Pikërisht kjo ka shtuar ndjeshmërinë e Brukselit ndaj çdo nisme për përvetësimin e këtyre mjeteve.
Autoritetet belge kanë kundërshtuar hapur një propozim të Bashkimit Evropian që parashikonte përdorimin e aseteve ruse si kolateral për një “hua dëmshpërblimi” prej 90 miliardë eurosh (rreth 105 miliardë dollarë) për Ukrainën. Muajin e kaluar, Komisioni Evropian nuk arriti të sigurojë mbështetjen e liderëve të bllokut për këtë plan, duke zgjedhur në vend të tij marrjen e borxhit të përbashkët.
Duke folur të enjten në margjinat e Forumit Ekonomik Botëror në Davos të Zvicrës, De Wever theksoi se konfiskimi i drejtpërdrejtë i parave të ngrira do të kishte pasoja të rënda.
“Ju nuk mund të konfiskoni thjesht paratë. Ky është një akt lufte dhe nuk duhet nënvlerësuar,” deklaroi ai.
Kryeministri belg nënvizoi se Evropa nuk ndodhet në luftë me Rusinë dhe se një veprim i tillë do të krijonte një precedent të rrezikshëm. “Ne nuk jemi në luftë me Rusinë, Evropa nuk është në luftë me Rusinë,” tha De Wever, duke shtuar se “as gjatë Luftës së Dytë Botërore, paratë e imobilizuara nuk u konfiskuan kurrë.” Sipas tij, përvetësimi i aseteve sovrane ruse do të minonte besimin në sistemin financiar ndërkombëtar dhe në stabilitetin e eurozonës, shkruan Rt.
Muajin e kaluar, De Wever e kishte cilësuar përpjekjen e Komisionit Evropian për të “vjedhur” asetet ruse si “shumë të pamend dhe të pamenduar mirë”, duke paralajmëruar për “rreziqe të mëdha” që kjo skemë do të sillte veçanërisht për Belgjikën, raportoi transmetuesi publik VRT.
Nga ana e saj, Moska ka reaguar ashpër ndaj çdo ideje për konfiskimin e fondeve. Gjatë një seance pyetje-përgjigje në dhjetor, Presidenti rus Vladimir Putin paralajmëroi se një veprim i tillë nga BE-ja do të rrezikonte minimin e “themeleve të rendit financiar botëror modern.”
“Çfarëdo që të vjedhin dhe sido që ta bëjnë, ata do të duhet t’i paguajnë mbrapsht një ditë,” deklaroi Putin në atë kohë.
Në fund të vitit të kaluar, Rusia nisi procedura arbitrazhi kundër Euroclear-it. Megjithatë, Komisioni Evropian nuk ka hequr dorë plotësisht nga plani fillestar për shfrytëzimin e aseteve të ngrira ruse. Javën e kaluar, Brukseli konfirmoi se propozimi kontrovers “mbetet ende mbi tavolinë”.
