Reanimacioni i Qendrës Spitalore Nënë Tereza mbeti pa energji elektrike pas një avarie që preku një pjesë të mirë të Tiranës.
Në një video të shpërndarë nga JOQ, duken korridoret e reanimacionit në terr ndërsa sipas familjarëve, të sëmurët janë nxjerrë nga dhomat.
Ndërsa nuk dihet ende sa kohë ka zgjatur mungesa e energjisë në një institucion të rëndësisë së veçantë siç është QSUT-ja dhe veçanërisht reparti i reanimacionit, sipas drejtuesve të QSUT-së, ndërprerja ka zgjatur për një periudhë të shkurtër, pa sqaruar sa e shkurtër ka qenë ajo.
Njoftimi nga QSUT
*Informacion për qytetarët*
Qendra Spitalore Universitare “Nënë Tereza” informon se sot në mbrëmje, për shkak të një defekti në linjën e furnizimit me energji elektrike të tensionit të lartë që furnizon Godinën A2 të QSUT, ka pasur një ndërprerje të përkohshme të energjisë elektrike.
Falë aktivizimit të menjëhershëm të sistemeve rezervë (UPS, Gjeneratorë), aparaturat mjekësore jetike kanë vijuar të funksionojnë normalisht, duke garantuar vijimësinë e trajtimit dhe duke mos u cenuar në asnjë moment jeta e pacientëve.
Menjëherë, ekipet mjekësore, teknike dhe drejtuese janë vënë në gatishmëri të plotë, duke vepruar sipas protokolleve të sigurisë dhe duke ofruar çdo suport të nevojshëm, për garantimin e shërbimit shëndetësor si dhe duke marrë masat e nevojshme.
QSUT siguron qytetarët se situata është menaxhuar me përgjegjësi dhe profesionalizëm dhe se institucioni mbetet në gatishmëri të plotë, për të përballuar çdo situatë, në funksion të mbrojtjes së shëndetit dhe jetës së pacientëve.
QSUT ka ngritur menjehere grupin e punës për verifikimin e situatës.”
