Fermerët në mbarë Francën kanë vazhduar të bllokojnë autostrada dhe porte kryesore në shenjë proteste kundër një marrëveshjeje tregtare midis BE-së dhe bllokut ekonomik të Amerikës Latine, Mercosur.
Punonjësit e bujqësisë citojnë konkurrencën e pandershme nga prodhuesit e mishit të Amerikës Latine, të cilët nuk janë të detyruar të ndjekin rregullat strikte mjedisore të BE-së.
Sipas raporteve të mediave lokale, herët të hënën, rreth 30 traktorë dhe 60 protestues ngritën një barrikadë me paleta kashte jashtë objekteve të naftës në portin industrial të La Pallice, pranë La Rochelle. Rreth 30 traktorë bllokuan hyrjen në një pikë drithi në portin e Bayonne, në shkelje të ndalimit të grumbullimeve të vendosur nga autoritetet lokale.
Në portin e Le Havre, një pikë kyçe për importet ushqimore, 150 protestues përdorën makineri bujqësore për të ngadalësuar aktivitetin. Ata e quajtën veten “douanes agricoles” (doganierë fermerë), duke hapur kamionët për të inspektuar nëse mallrat brenda tyre përputheshin me standardet e BE-së, por pa arritur në një bllokadë të plotë.
Në veri të vendit, dhjetëra punonjës bujqësorë mbajtën të bllokuar autostradën më të ngarkuar të Francës, A1, midis Parisit dhe Lilës. Organizatorët planifikojnë të vazhdojnë protestat të paktën deri të mërkurën.
Manifestimet mbi rregullat e qeverisë franceze për asgjësimin e tufave me raste të sëmundjes gungore të lëkurës (Lumpy Skin Disease) filluan në dhjetor, por ato u zgjeruan shpejt duke përfshirë sindikatat e zemëruara për traktatin me Mercosur. Punonjësit e bujqësisë në Itali, Poloni dhe Irlandë kanë protestuar gjithashtu kundër kësaj marrëveshjeje.
Çfarë është Mercosur?
Mercosur bashkon Argjentinën, Bolivinë, Brazilin, Paraguajin dhe Uruguajin, ndërsa anëtarësimi i plotë i Venezuelës është pezulluar që nga viti 2016. Marrëveshja pritet të krijojë një nga zonat më të mëdha të tregtisë së lirë në botë, duke mbuluar më shumë se 700 milionë konsumatorë.
“Truku Procedural” i Komisionit Evropian
Të dielën, presidentja e Komisionit Evropian, Ursula von der Leyen, njoftoi se traktati me Mercosur do të nënshkruhet në Paraguaj më 17 janar. Komisioni Evropian është akuzuar për shtyrjen përpara të marrëveshjes në vetëm 4 javë pas refuzimit të saj më 18 dhjetor, duke përdorur një “truk procedural”, shkruan Rt.
Duke e ndarë marrëveshjen në dy pjesë dhe duke votuar vetëm për pjesën tregtare me shumicë të cilësuar, ata anashkaluan nevojën për miratim nga parlamentet kombëtare. Kjo lejoi që marrëveshja të kalonte pavarësisht kundërshtimit zyrtar nga vende si Franca, Irlanda dhe Austria.
