Është ndarë nga jeta Ismet Bellova, një nga figurat më emblematike të sportit dhe gazetarisë sportive shqiptare, mësues, gazetar dhe komentator që la gjurmë të pashlyeshme në historinë e mikrofonit dhe të edukimit fizik në Shqipëri.
Ai lindi në Tiranë më 1 qershor 1934. Studimet e larta i përfundoi në ILKF “Vojo Kushi” në vitin 1960, duke iu përkushtuar më pas me pasion, profesionalizëm dhe dinjitet profesionit të mësuesit të edukimit fizik, si edhe gazetarisë sportive.
Rrugëtimi i tij në sport nisi herët, që në vitin 1948, kur u shpall kampion i vendit për të rinj në pingpong. Emri i Ismet Bellovës hyri në historinë e transmetimeve sportive shqiptare më 29 nëntor 1950, me komentimin e ndeshjes Dinamo – Partizani 1–0, finale e Kupës së Shqipërisë, duke shënuar kështu fillimin e një karriere të gjatë dhe të suksesshme në Radio Tirana.
Për kontributin e tij të jashtëzakonshëm në sport, arsim dhe gazetari, Ismet Bellova u nderua me një sërë titujsh dhe dekoratash, ndër të cilat spikasin: “Mësues i Popullit”, Urdhri “Naim Frashëri” i Klasit të Parë dhe i Artë, Urdhri i Punës i Klasit të Parë, titulli “Nderi i Sportit Shqiptar”, “Urdhri Olimpik”, “Mirënjohja e Tiranës”, “Nderi i Sportit Dibran”, si dhe titulli “Kalorës i Urdhërit të Flamurit”.
Gjatë jetës së tij, Bellova u vlerësua edhe me një sërë çmimesh profesionale. Në vitin 2004 u krijua Çmimi “Ismet Bellova” në gazetarinë sportive. Ai u nderua me Çmimin e Karrierës në TVSH, dy herë me Çmimin “Anton Mazreku”, si dhe me Mikrofonin e Artë në TVSH.
