Kryeministri Edi Rama mori pjesë online në Samitin e Zgjerimit të Bashkimit Evropian, ku foli për ecurinë e Shqipërisë drejt anëtarësimit në BE brenda vitit 2030.
Ai e përshkroi vendin si “kombin më euro-optimist në botë”, duke theksuar përkushtimin e qeverisë për të përmbushur detyrat e nevojshme për t’u bërë pjesë e Bashkimit Evropian.
“Një afat që vjen si rezultat i një përllogaritjeje shumë të thjeshtë. Së bashku me Komisionin kemi rënë dakord mbi një kalendar ambicioz, por i realizueshëm. Koha mesatare për ratifikimin në parlament pritet të jetë rreth dy vjet, kështu që parashikohet që Shqipëria të ulet në tryezën e BE-së në 2030,” tha Rama.
Ai shtoi se nuk përjashton mundësinë që vendi të përshpejtojë procesin, duke e krahasuar optimizmin shqiptar me një shprehje të ish-presidentit Donald Trump.
Rama foli gjithashtu për ministren e Inteligjencës Artificiale, Djellën, duke theksuar se sistemi i saj kundër korrupsionit synon një transformim të thellë dhe sistemik, jo vetëm trajtimin e rasteve individuale.
“Reforma në drejtësi është diçka e paparë për rajonin. Veprimtaria e SPAK-ut ka krijuar një shembull se lufta kundër korrupsionit është serioze, e ekuilibruar dhe pa dallime politike. Nuk pranojmë leksione për këtë,” deklaroi Rama, duke shtuar se brenda vitit 2027 do të jetë funksional sistemi i plotë i prokurimeve digjitale me Inteligjencë Artificiale.
Me humor, Rama përmendi gjithashtu shtatzëninë e ministrës Djella, duke thënë se ajo “pritet të lindë 83 foshnja” dhe se Shqipëria është i vetmi vend në rajon që ka përdorur IA në procesin e transferimit të korpusit ligjor, duke e bërë atë më të shpejtë dhe më efikas.
Ai përfundoi duke theksuar se vendi ka vendin më të mirë në zemrën e shqiptarit dhe meriton të jetë pjesë e Europës.
