Presidenti ukrainas, Volodymyr Zelenskyy, deklaroi se Ukraina po ecën me siguri drejt anëtarësimit në Bashkimin Evropian dhe theksoi nevojën që vendi i tij të bëhet pjesë e bllokut para vitit 2030.
Kjo deklaratë erdhi pas një raporti të Komisionit Evropian që vuri në dukje se përparimi i vendit mbetet i lidhur ngushtë me reformat, sidomos në fushën e sundimit të ligjit, përcjell The Guardian.
Duke folur nga qyteti i sulmuar Pokrovsk, pranë vijës së frontit, Zelenskyy tha se ushtarët ukrainas “nuk luftojnë vetëm për familjet dhe shtëpitë e tyre, por më gjerë, për të ardhmen e Ukrainës dhe të ardhmen e saj në Bashkimin Evropian”.
“Ukraina po lufton për pavarësinë e saj, dhe e ardhmja jonë është në BE, që është pjesë e kësaj pavarësie… për ne është një faktor i rëndësishëm që jemi vlerësuar lartë në këtë raport,” shtoi presidenti.
Ai theksoi gjithashtu se nuk dëshiron që procesi i anëtarësimit të zgjasë shumë, duke pranuar megjithatë se ritmi i bisedimeve vendoset nga vetë BE-ja.
“Sa më shpejt Ukraina të hapë klasterët dhe të zhvillojë negociatat e plota, aq më mirë për ne,” tha Zelenskyy.
Presidenti ukrainas mbrojti reformat anti-korrupsion në vend, edhe pse raporti i BE-së i bëri kritikë të theksuar këtij sektori.
Ai po ashtu zbuloi se ka biseduar me Donald Trump për ambiciet e Ukrainës për anëtarësim në BE, dhe sipas tij, ish-presidenti amerikan ofroi mbështetje dhe premtoi të ndihmojë në zhbllokimin e vetos së Hungarisë, pa dhënë një afat të saktë.
Zelenskyy theksoi se nuk synon të bëjë oferta të veçanta për kryeministrin hungarez, Viktor Orbán, për të hequr veton, duke shtuar se mbajtja e saj kundër procesit është vetëm në favor të Rusisë.
“Jemi në luftë për mbijetesën tonë, dhe do të dëshironim që kryeministri hungarez të na mbështeste, të paktën të mos na bllokonte,” tha ai.
Nga ana tjetër, presidentja e Moldavisë, Maia Sandu, deklaroi se vendi i saj është gati të hapë negociatat për të gjitha klasterët dhe pret që BE-ja të avancojë procesin, i cili mbetet i bllokuar për shkak të vetos së Hungarisë për Moldavinë dhe Ukrainën njëkohësisht.
“Të dy vendet janë të gatshme të kalojnë në hapin tjetër. Tani është përgjegjësi e BE-së të marrë vendimin dhe të ecë përpara,” tha Sandu.
Ajo paralajmëroi gjithashtu se politikanët pro-BE në Moldavi kanë arritur të sfidojnë dezinformimin rus dhe të fitojnë referendumin për BE-në, zgjedhjet presidenciale dhe ato parlamentare në 24 muajt e fundit, por “nëse nuk arrijmë rezultate brenda tre viteve – sepse pas tre viteve kemi zgjedhjet presidenciale – çfarë mesazhi do t’i japim qytetarëve?”
Raporti i Komisionit Evropian thekson se reformat, veçanërisht në sundimin e ligjit, janë kyçe për të dhënë mundësinë që Ukraina dhe vendet e tjera kandidat të përfundojnë negociatat e anëtarësimit provizorisht deri në fund të vitit 2028.
