Një tërmet me magnitudë 6.3 ballë goditi pranë qytetit verior afgan Mazar-e Sharif herët në mëngjesin e së hënës, duke vrarë të paktën 20 persona, plagosur qindra të tjerë dhe duke dëmtuar Xhaminë historike Blu të qytetit, njoftuan autoritetet. Sipas tyre, numri i viktimave mund të rritet ndërsa ekipet e shpëtimit arrijnë në zonat e izoluara.
Shërbimi Gjeologjik i SHBA-së (USGS) bëri të ditur se tërmeti ndodhi në një thellësi prej 28 kilometrash, pranë qytetit Mazar-e Sharif, i cili ka një popullsi prej rreth 523 mijë banorësh.
Sipas zëdhënësit të Ministrisë së Shëndetësisë, Sharfat Zaman, deri tani të paktën 20 persona kanë humbur jetën dhe rreth 320 janë plagosur, ndërsa paralajmërohet se bilanci mund të rritet teksa ekipet e shpëtimit po përparojnë drejt fshatrave të largëta në provincat Balkh dhe Samangan.
Pamjet e shpërndara në rrjetin social X tregojnë ekipet e emergjencës duke kërkuar për të mbijetuar në rrënoja, ndërsa në disa video shihen trupa të pajetë që nxirren nga ndërtesat e shembura. Agjencia Reuters theksoi se nuk ka mundur të verifikojë menjëherë autenticitetin e pamjeve.
“Ekipet tona të shpëtimit dhe të shëndetit kanë mbërritur në zonë, dhe të gjitha spitalet aty pranë janë vënë në gatishmëri për të trajtuar të plagosurit,” deklaroi Zaman.
Xhamia Blu, një nga monumentet më të rëndësishme fetare në Afganistan, ka pësuar dëmtime të pjesshme, tha zëdhënësi i provincës Balkh, Haji Zaid.
Xhamia konsiderohet si një ndër vendet më të shenjta të vendit dhe besohet të jetë vendi i varrimit të kushëririt dhe dhëndrit të Profetit Muhamed. Ndërtesa aktuale daton që nga shekulli i 15-të.
Pamjet e verifikuara nga Reuters tregojnë mure të çara dhe pllaka të thyera në oborrin e xhamisë, megjithëse struktura kryesore ka mbetur në këmbë.
Kjo tragjedi natyrore përbën një tjetër sfidë për administratën talebane, e cila tashmë përballet me një sërë krizash, përfshirë tërmetin shkatërrues të gushtit që vrau mijëra njerëz, rënien e ndihmës ndërkombëtare dhe deportimet masive të refugjatëve afganë nga vendet fqinje.
Pas lëkundjeve, vendi u përball me ndërprerje të energjisë elektrike në disa zona, përfshirë kryeqytetin Kabul, konfirmoi kompania kombëtare e energjisë Da Afghanistan Breshna Company.
Sipas Shërbimit Gjeologjik të SHBA-së, “ka gjasa që të ketë viktima të shumta dhe dëme të përhapura”, ndërsa autoritetet lokale po punojnë për të vlerësuar plotësisht pasojat e katastrofës.
