Luftëtarë që udhëtonin me deve rrethuan disa qindra burra pranë qytetit sudanez al-Fashir gjatë fundjavës dhe i çuan në një rezervuar, duke bërtitur fyerje racore para se të fillonin të qëllonin, sipas një burri i cili tha se ishte mes tyre.
Një nga rrëmbyesit e njohu se e kishte pasur shok shkolle dhe e lejoi të arratisej, tha burri, Alkheir Ismail, në një intervistë video të kryer nga një gazetar lokal në qytetin fqinj të Taëila në rajonin Darfur të vendit.
“Ai u tha atyre, ‘Mos e vrisni atë’,” tha Ismail.
Ai tha se kishte qenë duke u çuar ushqim të afërmve që kishin mbetur në qytet kur ai u marr nga Forcat e Mbështetjes së Shpejtë (RSF) të dielën. Reuters nuk mundi ta verifikonte menjëherë dëshminë e tij.
Ismail ishte një nga katër dëshmitarë dhe gjashtë punonjës të ndihmës humanitare të intervistuar nga Reuters, të cilët gjithashtu thanë se njerëzit që iknin nga al-Fashir ishin mbledhur në fshatrat aty pranë dhe burrat ishin ndarë nga gratë dhe ishin larguar. Në një dëshmi të mëparshme, një nga dëshmitarët tha se të shtëna me armë kishin shpërthyer më pas.
Aktivistët dhe analistët kanë paralajmëruar prej kohësh për vrasje hakmarrëse të bazuara në përkatësinë etnike nga ana e Forcave paramilitare të Mbështetjes së Shpejtë (RSF) nëse ata merrnin al-Fashir, fortesa e fundit e ushtrisë sudaneze në Darfur.
Zyra e të Drejtave të Njeriut e OKB-së ndau dëshmi të tjera të premten, duke vlerësuar se qindra civilë dhe luftëtarë të paarmatosur mund të jenë ekzekutuar. Vrasje të tilla konsiderohen krime lufte.
RSF, fitorja e të cilës në al-Fashir shënon një moment historik në luftën civile dy vjeçare e gjysmë të Sudanit, ka mohmuar abuzime të tilla – duke thënë se dëshmitë janë prodhuar nga armiqtë e tyre dhe duke bërë kundërakuza ndaj tyre.
