Kuvendi i Shqipërisë mblidhet sot në seancë plenare, të dytën për këtë javë, pas asaj të së hënës ku raportuan krerët e institucioneve të drejtësisë dhe u votua për ngritjen e komisioneve të posaçme për Reformën Zgjedhore dhe atë Territoriale.
Në rendin e ditës të seancës së parë, që nis në orën 10:00, është shqyrtimi i kërkesës së Partisë Demokratike për shkarkimin e Kryetarit të Kuvendit, Niko Peleshi, me argumentin se ka shkelur Kushtetutën dhe rregulloren e Kuvendit.
Pas kësaj, Kuvendi do të zhvillojë një seancë të dytë në orën 11:30, ku pritet të raportojnë për veprimtarinë e vitit 2024 disa institucione të rëndësishme, përfshirë:
Këshillin e Lartë të Prokurorisë,
Avokatin e Popullit,
Komisionerin për Mbikëqyrjen e Shërbimit Civil,
Institutin e Statistikave,
Autoritetin e Mediave Audiovizive, dhe
Radiotelevizionin Shqiptar.
Në këtë seancë do të shqyrtohen gjithashtu dy kërkesa të Partisë Demokratike për ngritjen e komisioneve hetimore.
E para lidhet me verifikimin e ligjshmërisë së veprimeve të zyrtarëve shqiptarë në raport me ish-agjentin e FBI-së, Charles McGonigal, ndërsa e dyta ka të bëjë me kontrollin e përdorimit të burimeve shtetërore për qëllime elektorale në zgjedhjet e 11 majit 2025.
Gjithashtu, Kuvendi pritet të miratojë edhe projekt-rezolutat për vlerësimin e veprimtarisë së institucioneve të drejtësisë, përfshirë Prokurorinë e Përgjithshme, SPAK-un, Këshillin e Lartë Gjyqësor dhe Inspektorin e Lartë të Drejtësisë.
