Shtatë pengje izraelite iu dorëzuan Forcave Mbrojtëse të Izraelit nga Gaza të hënën në mëngjes, duke i dhënë fund 738 ditëve të robërisë dhe duke shënuar fazën e parë të një shkëmbimi historik të të burgosurve sipas armëpushimit Izrael-Hamas.
Sipas zyrtarëve izraelitë, Eitan Mor, Gali dhe Ziv Berman, Matan Angrest, Omri Miran, Guy Gilboa-Dalal dhe Alon Ohel u transferuan nga Komiteti Ndërkombëtar i Kryqit të Kuq te forcat izraelite brenda Rripit dhe tani janë në rrugë për në Izrael për vlerësim mjekësor dhe ribashkim me familjet e tyre.
Zyrtarët e IDF dhe Shin Bet konfirmuan se pengjet u pritën shëndoshë e mirë dhe janë “në rrugën e tyre për në shtëpi”. Ushtria mbetet e përgatitur për transferime shtesë që priten më vonë të hënën, shkruan Ynet.
Grupi i radhës prej 13 pengjesh do të lirohet nga Khan Younis në Gazën jugore, sipas zyrtarëve të përfshirë në operacion.
Ndërsa një grup automjetesh ushtarake dhe mjekësore kaloi nga Gaza, skena ngazëllimi shpërthyen në të gjithë Izraelin. Familjet e pengjeve të liruara morën konfirmim direkt nga ushtria, duke përfshirë fotografi dhe mesazhe video. “Ata janë të sigurt dhe po kthehen në shtëpi”, tha një zëdhënës i IDF-së.
Në një zhvillim të jashtëzakonshëm, disa familje pengjesh morën telefonata dhe video-telefonata direkte nga Hamasi pak çaste para lirimit.
