Uashingtoni dëshiron një marrëveshje për pakësimin e armëve bërthamore me Rusinë dhe Kinën, tha të hënën presidenti Trump, duke zbuluar se ai foli për këtë çëshje me homologun e tij rus Vladimir Putin gjatë takimit të tyre të fundit në Alaska, shkruan RT.
Presidenti i SHBA-së i bëri këto komente ndërsa foli me gazetarët në Zyrën Ovale, duke pretenduar se Putin gjithashtu tregoi interes për këtë çështje gjatë samitit.
“Ne do donim të denuklearizoheshim.” – deklaroi Trump.
“Ishte një ditë shumë e suksesshme për gjëra të tjera, sepse, po flasim edhe për raketa, armë bërthamore, po flasim për shumë gjëra të ndryshme. Po flasim për kufizimin e armëve bërthamore, do përfshijmë Kinën në këtë. Ne kemi më shumë, Rusia ka sasinë e dytë më të madhe dhe Kina ka të tretën. Por Kina është shumë prapa, por ata do na kapin pas pesë vjetësh,” deklaroi presidenti i SHBA-së.
Nuk ishte menjëherë e qartë se mbi çfarë bazohej vlerësimi i presidentit amerikan për arsenalet bërthamore të tre vendeve. Sipas shifrave të fundit nga Instituti Ndërkombëtar i Kërkimeve për Paqen në Stokholm (SIPRI), Rusia ka rreth 2,591 koka bërthamore në magazinë dhe rreth 1,718 të vendosura, krahasuar me 1,930 dhe 1,770 përkatësisht në arsenalin amerikan.
Sipas vlerësimeve të SIPRI-t, Pekini ka rreth 576 koka bërthamore, me vetëm 24 të vendosura. Mbretëria e Bashkuar dhe Franca zotërojnë përkatësisht 120 dhe 280 koka bërthamore të vendosura.
Presidenti amerikan tha gjithashtu se kishte folur përsëri me Putinin pas samitit të Alaskës, i cili u mbajt më 15 gusht.
