Donald Trump ka zgjatur edhe për 90 ditë të tjera afatin për arritjen e një marrëveshjeje tregtare me Meksikën, duke nxitur spekulime se ai mund të shpallë gjithashtu pauza për disa dhjetëra vende që përballen me tarifa ndëshkuese duke filluar nga e premtja, sipas The Guardian.
Afati i mëparshëm prej 90 ditësh për marrëveshjen me Meksikën ishte zgjatur tashmë me katër javë, por presidenti amerikan tha se kishte vendosur të jepte më shumë kohë për shkak të kompleksitetit të marrëdhënieve tregtare me këtë vend.
Në një postim në rrjetin e tij Truth Social, Trump shkroi: “Do të flasim me Meksikën gjatë 90 ditëve të ardhshme me qëllimin për të nënshkruar një marrëveshje tregtare brenda këtij afati ose më gjatë.”
Më shumë se dy javë më parë, Trump kërcënoi Bashkimin Evropian dhe Meksikën me tarifa 30% për shumicën e eksporteve të tyre në SHBA. Por të dielën e kaluar ai arriti një marrëveshje me Brukselin që parashikon një tarifë bazë prej 15% duke filluar nga 1 gushti.
Në deklaratën e tij të fundit, Trump tha se kishte zhvilluar një bisedë telefonike “shumë të suksesshme” me presidenten e Meksikës, Claudia Sheinbaum: “Kompleksitetet e një marrëveshjeje me Meksikën janë disi ndryshe nga vendet e tjera për shkak të problemeve dhe pasurive që paraqet kufiri.”
Ai shtoi se të dy vendet kishin rënë dakord për të zgjatur për 90 ditë të njëjtën marrëveshje të përkohshme që kishte qenë në fuqi më herët: Meksika do të vazhdojë të paguajë një tarifë 25% për fentanylin, 25% për makinat dhe 50% për çelikun, aluminin dhe bakrin.
Sipas Trump, Meksika ka rënë gjithashtu dakord të “heqë menjëherë barrierat jotarifore tregtare, të cilat ishin të shumta”, pa dhënë detaje të mëtejshme. Barrierat jotarifore përfshijnë zakonisht burokraci komplekse, standarde teknike dhe rregullore për produktet ushqimore.
Ndërkohë, dhjetëra vende të tjera që nuk kanë nënshkruar një marrëveshje tregtare me SHBA-në pritet të përballen me tarifa ndëshkuese nga e premtja. Këto përfshijnë vende nga më të varfrat në botë si Lesotoja, Bangladeshi dhe Nepali, por edhe ekonomitë më të pasura si Kanadaja dhe Tajvani.
Deri tani, marrëveshje janë arritur vetëm me 8 nga 60 vendet për të cilat Trump, në muajin prill, kishte paralajmëruar tarifa të ashpra “reciproke” në shenjë hakmarrjeje për, siç tha ai, “vite plaçkitjeje dhe shfrytëzimi të Amerikës”, duke e shpallur atë ditë si “ditën e çlirimit.”
Për Kinën, një afat i veçantë skadon më 12 gusht. Një zgjatje është rënë parimisht dakord, por ende nuk është miratuar nga Shtëpia e Bardhë.
