Një anije me aktivistë, e quajtur Handala, që është nisur drejt Rripit të Gazës për të sfiduar bllokadën detare izraelite, pritet të ndalohet këtë të shtunë nga forcat detare të Izraelit. Kjo ndërhyrje pritet të ndodhë pothuajse gjashtë javë pasi një flotilje tjetër u kap nga komandot izraelite gjatë një përpjekjeje të ngjashme, përcjell YNetNews.
Anija u nis të dielën e kaluar nga Italia dhe, sipas aktivistëve në bord, tashmë ndodhet pranë pikës ku u ndalua flotilja e mëparshme. Ata kanë njoftuar se presin ndërhyrje të menjëhershme.
Një zyrtar izraelit ka deklaruar për mediat se:
“Nëse ata nuk pranojnë të kthehen pas, do të marrim kontrollin e anijes.”
Në përputhje me politikat e mëparshme, Izraeli nuk pritet të lejojë që anija të mbërrijë në brigjet e Gazës.
Skenari më i mundshëm, sipas burimeve izraelite, është që njësia elitare Shayetet 13 të ndërhyjë për të marrë nën kontroll anijen, ta devijojë drejt portit të Ashdodit dhe më pas të deportojë aktivistët që ndodhen në bord.
Mbrëmjen e së premtes, Freedom Flotilla Coalition, organizatorët e udhëtimit, njoftuan se kishin humbur kontaktet me anijen Handala. Pas disa orësh, lidhja u rikthye, megjithatë aktivistët thanë se dronë izraelitë po fluturonin mbi ta.
Incidenti ka ngritur sërish shqetësime për përshkallëzim të tensioneve në ujërat pranë Gazës, në një kohë kur bllokada izraelite ndaj enklavës palestineze mbetet një nga pikat më të mprehta të konfliktit izraelito-palestinez.
