Presidenti i SHBA-së, Donald Trump, tha të dielën se vende të tjera i janë drejtuar së fundmi për t’u bashkuar me Marrëveshjet e Abrahamit, serinë e marrëveshjeve të normalizimit midis Izraelit dhe disa shteteve arabe të ndërmjetësuara gjatë qeverisjes së tij.
“Kemi disa vende vërtet të shkëlqyera atje tani, dhe mendoj se do fillojmë të ecim para”, i tha Trump gazetares Maria Bartiromo të Fox News. Ai shtoi se dikur kishte besuar se edhe Irani mund t’i bashkohej marrëveshjeve, shkruan Ynet.
I pyetur nëse Siria mund të normalizonte marrëdhëniet me Izraelin, Trump u përgjigj: “Nuk e di, por i hoqa sanksionet me kërkesë të disa vendeve të tjera në zonë që janë miq me ne. I hoqa sanksionet ndaj Sirisë për t’u dhënë atyre një mundësi sepse sanksionet janë të ashpra. Ato janë shumë të forta. Dhe ne kemi sanksione edhe ndaj Iranit.”
Duke iu drejtuar sulmit të SHBA-së ndaj objekteve bërthamore të Iranit, Trump tha se regjimi iranian ishte “javë” larg nga sigurimi i një arme bërthamore, duke e shtyrë atë të miratonte veprime ushtarake. Ai zbuloi se një nga tre objektivat iraniane konsiderohej “i padepërtueshëm” dhe ndodhej 30 kate nën granit. Trump tha se lufta i shkaktoi dëme Iranit, Izraelit dhe aleatëve amerikanë, por ndaloi përkohësisht ambiciet bërthamore të Iranit.
Trump pretendoi se sulmet ishin të suksesshme, duke e hedhur poshtë skepticizmin e medias si “lajm të rremë”. Ai gjithashtu vlerësoi pilotët e përfshirë, duke thënë se ata fluturuan për 36 orë dhe goditën një objektiv me madhësinë e derës së frigoriferit nga 15 kilometra me shpejtësi të lartë.
I pyetur nëse Irani kishte arritur të fshihte uraniumin para sulmit, Trump e mohoi mundësinë, duke thënë se materiali ishte shumë i rrezikshëm, i rëndë dhe i vështirë për t’u lëvizur, dhe se regjimi kishte pak paralajmërim paraprak.
Në një postim në Truth Social, Trump pretendoi se e kishte shpëtuar Khamenein nga një “VDEKJE SHUMË E SHËMTUAR DHE TURPËRUESE” duke kundërshtuar planet izraelite për ta vrarë atë.
“E dija SAKTËSISHT se ku ishte strehuar dhe nuk do e lija Izraelin, apo Forcat e Armatosura të SHBA-së, deri tani më të Mëdhat dhe më të Fuqishmet në Botë, t’i jepnin fund jetës së tij. Dhe ai nuk ka pse të thotë, ‘FALEMINDERIT, PRESIDENT TRUMP!'”
