Sekretari i Shtetit i SHBA-së, Marco Rubio, ka kritikuar vendimin e Britanisë për të vendosur sanksione ndaj dy ministrave izraelitë, Bezalel Smotrich dhe Itamar Ben-Gvir, duke deklaruar se ky hap nuk ndihmon përpjekjet amerikane për një armëpushim në Gaza, përcjell Politico.
Rubio ka theksuar se sanksionet e vendosura nga Britania, së bashku me Kanada, Norvegji, Australi dhe Zelandën e Re, nuk kontribuojnë në përfundimin e luftës dhe lirimin e pengjeve. Ai ka bërë thirrje për rishikimin e këtij vendimi dhe ka theksuar se SHBA qëndron “krah për krah me Izraelin”.
Ndërkohë, Britania ka argumentuar se sanksionet janë vendosur për shkak të “nxitjes së dhunës ekstreme” nga ministrat izraelitë dhe shkeljeve të të drejtave të palestinezëve. Izraeli e ka cilësuar këtë vendim si “të papranueshëm” dhe pritet të shqyrtojë një përgjigje zyrtare në ditët në vijim.
